- Бадма ламхай, Агын дасанда олон шэнэ һонинууд болобо гээшэ. Тэрээн тушаа тодорхойгоор хөөрэжэ үгыт.
   Манай дасанда табан жэлэй нэгэ удаа шэрээтэеэ һунгажа, шэрээдэ һуулгадаг гээшэ. Дасанай санаартанай намай шэрээтээрээ хүдэлыт гэхэдэнь, арад зонойнгоо түлөө буянта хэрэгээ үргэлжэлүүлхэ гэжэ шиидээб. Лама санаартанайнгаа, нютаг зонойнгоо найдалда хүртэһэндөө баяртайб. Манай хүндэтэ Чингиз лама Сультимов 1999 онһоо хойшо мүнөө болотор Ехэ гэсхын тушаал эзэлжэ ябаһанаа болибо. Чингиз ламхай Буддын шажанай академиин ректорэй уялгата албаяа саашань дүүргэхэ. Хоёр ажал хабсаруулаад ябуулхань хүндэ, тиихэдэнь шэнэ гэсхытэй болохо гэжэ зүбшэлсөөбди. Тиигэжэ залуу санаартан Даши ламые дасанай журам сахиха алба ударидахыень томилообди. Залуу санаартан ядамаргүй ажалаа ябуулна ааб даа. Хажуудань бага гэсхы Амгалан Жапов баһал үнинэй хүдэлжэ ябана. Амгалан лама зүбшөөл заабаринуудаар Даши ламадаа туһалжа байха.
   - Мүнөө жэл үшөө ямар түүхэтэ үйлэ хэрэгүүд болохоор хараалагданаб?
   - Ерэхэ жэл Агын дасанай бай-гуулагдаһаар 215 жэл гүйсэхэ юм. Ойн баяр угтуулан, хэмжээ ябуулгануудые эмхидхэхээр хараалнабди. Бэлэдхэлэй ажал ябуулхабди. Найр наадан болоно ааб даа. Хоёр зуу гаран жэлэй туршада Агын дасан hалбархашье, hандархашье сагуудые дабаа. Гэбэшье, хүн зоной оюун сэдьхэлэй хүсэн булижа, олоной аша оролдолгоор, засаг зургаанай дэмжэлтээр Агын дасан ганса буряад зониие бэшэ, оршон тойронхи арадуудые нэгэдүүлэн, амгалан байдалай түлөө хүгжэн hалбарна.

You have no rights to post comments