Тугшанай «Даша Гандалинг» дасанда үдэр бүри Чойжал сахюусан хурагдадаг.
Тугшанай дуган.
Монгол hарын тусхай үдэрнүүдтэ Сагаан Шүхэртэ, Алтан Гэрэл, Отошо, Мандал Шивэ, Сунды, Банзарагша хурагдадаг гуримтай. Шэрээтээр Содбо лама алба хаадаг. Тугшан нютагай захиргаанай толгойлогшын уялга дүүргэгшэ Оксана Базаргуруевагай манда мэдүүлһээр, Тугшанай дасанда нютагайхидһаа гадна, Зүдхэлиин, Баян-Булагай, Шандалиин зон ерэжэ, дасанайнгаа хэрэг бүтээдэг, ламанарта үзүүлдэг байна. Зундаа санаартан нютагайнгаа обоо тахидаг, Онон голой эзэдтэ Лусадай зай табидаг гээшэ. Шэрээтэ Содбо ламын ба нютагай эдэбхитэйшүүлэй үүсхэлээр Еши-Лодой Римбүүшэ «Жэнсрэг» хурал 2 дахин хураһан байха юм. Бурхантын обоодо баригдаһан Даша Гоман субаргын дэргэдэ хүрдэнүүдые тодхоһон байна. Үнгэрэгшэ 2016 ондо шэрээтын оролдолгоор Мааниин дуган, Тугшанай дасанда элдэб үе сагуудта алба хааһан 16 шэрээтэ ба ламанарта зорюулагдаһан «Жанчиб Шодон» субарга баригдаһан байна. Субарга бариха тухай һанамжа нютагай ажаһуугша Бальжит Намсараева оруулһан ха. Тэрэнь дэмжэгдэжэ, «Майдари» гэһэн һүзэгшэдэй шажанай бүлгэмэй түрүүлэгшэ Базарсадо Аюшиевай хүтэлбэри доро барилга ябуулагдаа һэн. Тиихэдэ Согшон дуганай баруун талада Аюша дуган шэнээр баригдажа рамнайлагдаһан байха юм. Тус дуганай барилга хүршэ Зүдхэли нютагай Мижитдоржи Дамдинжаповай ударидалга доро ябуулагдажа, ашаглалгада тушаагдаһан байна. Досоо талын жалсан, лаврин ба бусад хэрэгсэлнүүд Тугшанай, Алханын, Зүдхэлиин, Дулдаргын, Амидхаашын, Сагаан-Шулуутай ба бусад нютагуудай оёдолшодой хүсөөр бүтэһэн байха юм.
Дэлгэрэнгыгээр 43-дахи дугаарта.
