2019 оной июниин 22-то Могойтын аймагай Хара-Шэбэр нютагһаа арбан табан модоной зайда оршодог Гэзэгэн Шулуун гэжэ нангин шүтөөнэй газарта онгор хуасай омогой суута бүхэ Согтын Гомбодо (Бүхэ Гомбо) зорюулагдажа, дурасхаалай хүшөө бодхоогдоһон. Зугаалай ажахын малай аргашан, уран найруулагша, хизаар ороноо шэнжэлэгшэ Гомбо-Дугар Болотов үүсхэл гаргажа, суута бүхэдэ хүшөө бодхоохо ажал ябуулһан юм.
Гомбо-Дугар Болотов нютагайнгаа абарга бүхэ тушаа һонин баримтануудые манда хөөрэжэ үгэһэн байна. Сог-тын Гомбо 1870 ондо Гэзэгэн Хушуунда түрэһэн, эндэ гэртэхиниинь ажаһууһан ха. Багаһаа бэеэр мантан, багжагар, хүсэ шадалтай үндыһэн. Байгаалиһаа үршөөгдэһэн хүсэ шадалаараа бүхы зониие гайхуулдаг байгаа. Барилдахадаа, гартаха гээшые мэдэхэгүй. Агын хүдөө талаар ажаһуудаг бүхэшүүл тэрэниие унагаажа диилэдэггүй һэн. Урдаһаань гарахаяа айдаг байһан гэхэдэ алдуугүй. Тэрэ 500-600 кг шулуу дээшэнь ядамаргүй үргэдэг байһан ха. Бүхын үргэдэг шулуу таба-зургаан хүдэр бүһэтэн бэлэндэ үргэжэ гү, али һууриһаань бэлээр хүдэлгэжэ шададаггүй һэн гэхэ. Дурасхаалай хүшөөгэй дэргэдэ бүхын хэзээ нэгэтэ үргэһэн шулуу асаржа табихадаа, трактор техникэ хэрэглэһэн гээшэ.
(Үргэлжэлэлынь 12-дохи дугаарта).
Эрдэни ЧИМИТДОРЖИЕВ.
