Анха түрүүн hэеы гэр соо дуган байгуулагдаhан гэхэ. Дасан бариха зорилготойгоор Ага найман эсэгын түлөөлэгшэд Галсан Мардаев тайшаае урижа, газар заахыень гуйhан байна. Харин Галсан Мардаевай газар олохын урда тээ тэрээндэ уншалгын абяан, хубарагуудай энеэлдээн, нохойнуудай хусалдаан зүүдэндэнь үзэгдэбэ. Тиигэжэ тэндэнь лэ, Булагтада, газар зааhан ха. Анаагай дасан бариhан ород яhанай барилгашад байшан шулуугаар бодхооhон юм. Барилга дүүрэжэ, 1816 ондо Дэрэстэйн «Лхундуб Дэчинлинг» дасанай шэрээтэ Ринчин ламхай Агын дасан рамнайлаа. Тиин «Дэчен Лхундублинг» гэжэ нэрэтэй, Жамсаран, Һама сахюусадтай болоhон байна.
   Хожомоо гүн ухаанай (цанит) hургуули нээгдээ, тэндэ эмнэлгын ба Дуйнхор факультедүүд, бар хэблэлгын типографи байгуулагдаа. Барай сүмэдэ түбэд, монгол хэлэнүүд дээрэ барладаг 40 мянган хабтагай, мүн номуудта хэблэгдэхэ бурханай хүрэгүүдтэй хэбүүд байгаа. Тиин гүн ухаанай, эмнэлгын, тарниин, Дуйнхор hургуулинуудта гол түлэб номуудыень хэблэхэ арга олгогдоо. Гадна ламанарайшье, юрын зонойшье үзэхэ үзэглэл, дүримүүдэй пособинууд, түбэд-монгол толинууд, гэгээрэлэй ба хүмүүжүүлгын номууд хэблэгдэдэг болоо.
   Агын дасан Орос гүрэн дотор буддын шажанай ехэ түб болоо юм. Аха дүү Лубсан-Доржо ба Ринчин-Самбу Данжиновуудай ударидалга доро 1884 ондо эмнэлгын факультет нээгдэhэн юм. 1800-гаад онуудай хоёрдохи хахадhаа эхилээд, 25 жэлэй туршада аргагүй ехэ барилганууд тогтон торонгүй болоо. 1875-1886 онуудта Согшон дуган баригдаа. Энэ ехэ барилгын эсэстэ 13 дуган гэжэ тоологдоо, 700 (зарим баримтануудаар 1000) ламанар уншалгануудта хабаадажа байгаа. Согшон дуганай түрүүшын байшан 1890 ондо Диваажан дуган болгогдоо.

You have no rights to post comments