Агын дасанай шэрээтэ Цыбиков Бадма ламхайн хэлэһээр, хүн гээшэ хүрдэ эрьюулхэдээ, хүрдэнүүд соо бурхан байдаг гэжэ ойлгохо ёһотой. Досоонь голтой, тэрээндэ олон тарнинууд орёогоотой байдаг. «ОМ МААНИ БАДМАЙ ХУМ» гэһэн тарни уншажа, хүрдэ эрьюулхэ. Тарнинууд али нэгэн бурханда зорюулагдажа бэшээтэй. Агын дасанда Арьяа Баала бурханай тарнинуудтай хүрдэнүүд тодхоотой гээшэ. Эмшэ багшын тамгатай тарнинуудые, ламанар олон болгожо сохёод, хүрдэнүүд соо хэһэн. Хүрдэнүүд томо ба бага гээд байха. Томо хүрдэнүүд соо бурханай ном – Ганжуур хэгдэһэн байдаг. Тиихэдэ 100 ба 200 Ганжууртай хүрдэнүүд бии. Агын дасанай пресс-секретарь Цыдып Тудуповай хэлэһээр, хүрдэ эрьюулхэдэ, тарнинууд дээшээ гаража, хамаг юумэндэ туһа хүргэнэ. Хүрдэ эрьюулһэн хүн бэеэрээ буян олоно бшуу.
Бисалгал гээшэ баһал сэдь-хэлээрээ хэһэн буянуудай тоодо ороно. Зарлигаар буян хэхэ гэжэ бии. Энэ болбол тарни, маани уншаха. Хүрдэ эрьюулхэ гээшэ бүхы юумэн арюун байг, харанхы муу юумэнһээ зайлаха, буян нэмэг гэһэн удхатай.

Хүрдэнүүдэй илгаа
Уһан, һалхин, гар ба маа-ниин хүрдэнүүд бии. Уһан хүрдэ уһанай эршэгэнээнһээ хүдэлжэ эрьелдэдэг. Һалхин хүрдэ һалхинай үлеэхэдэ эрьелдэдэг юм. Гар хүрдэ зон гартаа барижа, тарнияа уншан, тэрэнээ эрьюулхэ. Бидэ, һүзэгшэд, дасан дугангуудаар ябахадаа, мааниин хүрдэнүүдые эрьюулнэбди. Мааниин хүрдэнүүд эмшэ багшын хэбээр хэгдэһэн байдаг. Гороогой замда хэмжүүрээрээ бага аад, олон хүрдэнүүд дайралдадаг, тиихэдэ томо хүрдэнүүд доншуур гэжэ нэрэтэй. Доншуур хүрдэнүүдые хэдэн зон нэгэ доро эрьюулдэг гээшэ. Хүрдэ 108 эрьюулхэдэ, доншуур маани 100 сая дахин уншагдадаг.

Дэлгэрэнгыгээр "Толон" Һониной 30-дахи дугаарта.

You have no rights to post comments