Эгэтын дасан гороолжо ябахадаа, нэн түрүүн урдын ламанарай олон субаргада һүгэдэн мүргэбэбди. Дасанай горломой газаахи зүүн урда тээхи гурбан субаргын «Боди субарга Гармын Лопил ламада» гэжэ бэшээтэй байба. Баруун урагшаа алхалхадамнай, баһал 3 субарга толорон харагдаа. Тэдэнэй 2-ынь Хубарагай ламхайда ба Сэбэгэй Гомбо ламхайда зорюулагдаа бшуу. Дасанай эгээл урда талада холохон зайда оршодог хорёолоотой субаргада дүтэлхэдөө, «Эрдэниин Соржын субарган» гэжэ улаан үзэгүүдээр бэшээтэй, түмэн жаргалан угалзаар хүбөөлөөтэй гаршаг уншабабди. Минии ойлгоходо, Эгэтын дасанай соржо лама Гомбо-Доржо Эрдынеевтэ зорюулагдаһан шүтөөн байжа болоо. Ушарынь гэхэдэ, Эрдэниин Соржо ламые эрдэни зэндэмэнитэ Зандан Жуу Ярууна нютагаа залажа асарһан хүн гэжэ хэлсэдэг байна. Жүдэй хамба Зодбын ламхайн, 4-дугаар шэрээтэ Бужиин ламхайн, 5-дугаар шэрээтэ Санжиин ламхайн субаргануудые гурба дахин гороолоо, хии мори хиидхэдэг тусхай газарта хадаг үргөөбди. Тэбхэр 10 жэлэй саана рамнайлагдаһан, шулуугаар бариһан, хоёр арсалан харуулшантай Зандан Жуугай һайхан ордон ороходомнай, нангин шүтөөн амиды мэтээр үзэгдөө.
Зандан Жуу бурхан тухай горломой газаа үлгөөтэй томо хабтаһан дээрэ иижэ бэшээтэй байба: «Будда бурханай хүрэг бүтээхэеэ эльгээгдэһэн урашуулда бурханиие бэеэрээ байхыень хараха зүбшөөл үгтэһэн байбашье, тэрэнэй дүрэһөө сасарһан толон нюдэ һаргаама хэмжэшэгүй, дундаршагүй байжа, нюдэнэй хараа тэнсэлгүй һаргаагаа. Бишуу Гарма түрүүтэй барималшад ажаглан харахые ядалдажа, ажалаа эхилхэеэ ядалдаа. Будда тэдэниие ойлгон хайрлажа, уһанай эрьедэ зогсожо үгөө. Уһанай нюруу дээрэ мэлмэрэн харагдаһан дүрсыень бии бэлигээр, хёрхо нюдөөр дархашуул адаглан шэнжэлээ, ой ухаан соогоо тодорхойлоо. Замби түбидөө бусажа ерэһээр, нэгэ үдэрэй туршада сэдьхэл бодолоо, арга шадалаа элсүүлэн бисалгажа, гоширго гэдэг зандан модоор нангин хүрэг бүрин бүтээжэ шадаба. Бурханай хүрэгэй хубсаһа нэмэргынь эбхэлээнүүд долгитожо, уһанай нюруугай миралзаһан мэтэ һэн. Нангин хүрэг тэрэл үдэртөө ордон соо хүндэтэйгөөр тахигдаа бэлэй.
Будда Шэгэмүүни гушан гурбан бурхадай оронһоо хүн амитанай дэлхэйдэ буужа морилходоо, барималшые маша ехээр магтажа, баяр баясхаланаа мэдүүлэн лүндэнлэбэ: «Шинии бодхооһон хүрэг минии шажанда сэгнэшэгүй ехэ туһа асаржа, ерээдүйн сагай һайн хубарагуудай этигэлэй үрэһэн болон тодорхо, буянта мүрые даган баясагша тоогүй олон амитанай нангин шүтөөн гэгдэн тахигдаха. Сэмүүн сагуудта үйлэдэһэн нүгэлые нимгэрүүлхэ юунтэйшье сасуулшагүй мүргэлэй зүйл болон Татхагаатын дүрэ зурагые үзүүлхэ уралигай дээжэ гэгдэн, алдаршаха байна. Һайн дураараа үйлэдэһэн шинии буян дундаршагүй».
Зандан Жуу бурханай хүрэг 1200 жэлэй туршада Энэдхэг ороной дэбисхэр дээрэ оршон байгаа. Будда тэрэнэй хойто зүг руу, имагтал Хитад, Түбэд ба Монгол орон тээшэ шэлжэхэ байһыень уридшалан абаралдаһан. Тэрэнь зүб байһаниинь элирээ. Зандан Жуу бурхан хайшаа шэглэн ошоноб, тэндэл буддын шажанай заатагүй дэлгэрдэгынь үнэн. 1901 оной үбэл Байгалай үмэнэхи дайдада Зандан Жуу бурханай морилһон ушар Орос гүрэндэ шарын шажанай үндэр һургаалай улам дэбжэхын үйлэ шалтагаан боложо үгөө. 1935 ондо Буряадай түүхын музейн хадагаламжаһаа одоошье абтажа, Зандан Жуу бурхамнай Эгэтынгээ дасан руу вертолёдоор асарагдаһан түүхэтэй.
Зандан Жууе бодото бурхан багша гэжэ тоолохо, урдань тахил табижа, үе мүсөөрөө һунажа мүргэхэ, тонгойжо мүргэхэ, гороолхо, хэлээрээ маани мэгзэм тооложо, Гурбан Эрдэнидэ магтаал түүрээхэ, зальбархадаа, эхэ зургаан зүйл хамаг амитанай туһын түлөө гэжэ хандаха, ухаагаараа бодисадын, энэрхы сэдьхэлэй зүг руу шэглэн бисалгаха хэрэгтэй гэһэн Бурхан багшын лүндэн бии».
Бидэшье, Ага нютагһаа ябаһан сурбалжалагшад, Зандан Жууда зальбаржа, һунажа мүргөөд, тэндэ маани мэгзэм уншажа, тахил үргэжэ байһан ламанарай буянта хэрэгтэйнь танилсаад, харгыгаа үргэлжэлүүлээбди.

You have no rights to post comments