Угдаанай «Содном Даржалинг» дасанай ламанар үдэр бүри уншалгануудаа бүтээжэ, ажалаа хэнэ. Һая мүндэлһэн 2019 оной үбэлэй амаралтын үдэрнүүдһээ эхилжэ, Угдаанай дасанда хүлгөөтэй болонги. Шэрээтэ Түмэн ламхайн хэлэһээр, ажаһуугшад ганса үмсынгөө хэрэг бүтээхэеэ ерэнэ бэшэ, мүн буян хуряажа, санаартанай гэр байра ариг сэбэр болгоно, досоо газаагүй сагаадана. Дасанай гуламтын хорёо соо бага бэшэ ажал хэгдэнэ. Гахай жэлдэ түрэһэн зон ажал хүдэлмэри үүсхэжэ, буянта хэрэгтэ хубитаяа оруулна. Сагаан һарын хуралнууд январиин 31-дэ эхилхэнь. Бэшэ дасангуудта орходоо нэгэ үдэр урид эхилдэг заншалтай. Мүнөө Угдаанай дасанда 5 ламанар ба 1 хубараг буянта хэрэгүүдые үйлэдэнэ. Түмэн ламхайн хэлэһээр, гэсхы Баир лама эмнэлгын газарта арга абана, хуралнуудта хабаадахагүй. Шэтын дасанһаа Цыбенжаб, Агаһаа Базар ламбгайнар ерэжэ, хуралнуудые бүтээлсэхэ бшуу.
   Түмэн ламхайн һанаа зобоомо асуудалнуудай нэгэн гэхэдэ, Сагаалганай үедэ бага Согшон дуган соо олон хүн багтахагүй. Дасан бараалхадаг һүзэгшэдэй тоо һүүлэй жэлнүүдтэ олошорно. Ехэ Согшон дуганай барилга эхилээдүй. Хэдэн жэлэй саана байшанай һууриин нүхэн малтаатай. Бэшэ юумэн хэгдээдүй бшуу. Дасанай гол сүмын барилгада мүнгэн зөөри хэрэгтэй. Гүрэнэй банкда зоной хандиб үргэхэ счёт нээһэниинь, урагшаа ябанагүй. Тэрээнтэй хамта дасанай байра байдал, ажахы хүгжөөлгын талаар олон тоото асуудалнууд шэрээтын һанаа зобоодог. Үнгэрэгшэ жэлдэ Манбын дуган бодхоогдожо, ашаглалгада тушаагданхай. Манбын дуган соо Отошо хурал хурагдана. Санаартанай хоол баридаг жаганай барилга үргэлжэлһөөр. Байшанай барилгын гурбанай нэгэ хуби бүтээд байна. Энэ болбол торхонь гансал хушагдаад байна. Палааха, сонхо, үһээень хэхэ үлэнхэй.
   Угдаанай дасанай ламанар Хоолошной hууринда уншалгын hэеы гэр бодхооhон юм. Һэеы гэр соогоо зайн галгүй байһанаа, гэрэлтэй болгоо бшуу. Хоолошной һуурин урданай баян түүхэтэй. Харин хүдөө һуурин гэжэ хуулиин нэрэтэй болоһоорнь, 15 жэл болобо. Август һарада ойн баяр болохоор хүлеэгдэнэ. Ринчинов Түмэн ламхай эмхидхэлэй хорооной гэшүүн болоһон байна. Эргэнэдэ, Тэлэмбэдэ дугантай. Тиишээ ламанар ошожо, 18 боти ном уншадаг. Эндэ һая тэдэ нютагуудаар ажаһуудаг зоной гуйлтаар тиишээ ошожо, Сахюусан хурал хураһан байна.

You have no rights to post comments