Үнгэрэгшэ жэлһээ эхилжэ, Жамсаран, Дамдин Дорлиг, Хаан хуралнуудые хуража эхилээ. Дасанда 7 лама санаартан алба хаана. Дасанда хуралнууд һаадгүй, саг соогоо хурагдажа байдаг. Сахюусанай сүмэ соо үдэр бүри Согой хурал хурагдадаг. Отошо монгол һарын 8-да, Мандал Шива – 15-да, Алтан гэрэл – 18-да, Сахюусан 29-дэ уншагдадаг.
   Дасанай шэрээтэ Митупов Батор ламхай дасанайнгаа ажабайдал тушаа иигэжэ хөөрэнэ: «Дасанаймнай комплексдо Сагаан Дара эхын дуган, Сахюусанай сүмэ, дасанай түрүүшын шэрээтэ байhан Собоо ламхай ба тэрэнэй хойто түрэлынь боложо тодорhон Нимын Жигжит лама гэгшэдэй hэргээhэн 2 субарга, лама санаартанай 2 гэр, жаган, гараж г.м. байшангууд ородог. Дасанаймнай гол шүтөөн хадаа Согшон дуганай гунгарбаа соо залаатай Сагаан Дара эхэ бурхан болоно. Сагаан Дара эхэ бурхан – хүнэй наhа утадхадаг шүтөөн. Зугаалайн дасан олон туhалагшадтай ба жиндагуудтай. Жиндагууднай гэхэдэ, олонхинь Зугаалай, Хара-Шэбэр нютагайхид, Первомайск hууринай, Шиилхын аймагай зон дасандамнай ябадаг. Зугаалай, Хара-Шэбэр, Первомайск нютагуудта буддын шажантанай бүлгэмүүд байдаг. Урагшаа hанаатай, hүзэгшэ бэрхэ олон нютагайхиднай бидэндэ туhалдаг. Холо хото тосхонгуудаар ажаhуудаг зугаалайнхид дасандаа заабол ерэжэ мүргэдэг. Ехэ хуралнуудай үедэ зон олоор ябажа мүргэдэг, гороо хэдэг».
   Дулаархада, Сагаан Дара эхын ордон соо заһабарилгын ажал ябуулжа эхилхэ хараа түсэбтэй. Тодорхойлходо, үһээ, ханануудые хушаха, шэрдэхэ, гунгарбаа заһабарилха. Гол түлэб, гунгарбаагаа хуша модоор гоёохо, һиилэхэ. Зоной гороолдог харгы дээгүүр плита дэбдихэ, нэмэри хүрдэнүүдые тодхохо ба бусад хүдэлмэринүүд бии.

You have no rights to post comments