Ноябриин 22-һоо 24 болотор Улаан-Үдэдэ ургажа ябаhан залуушуулаа эхэ hайхан хэлэндээ hургажа ябаhан багшанарай хоорондо «Эрхим багша» гэһэн уласхоорондын мүрысөөн түрүүшынхеэ үнгэрһэн байна.
Ц.Дашиева (баруун гарһаа хоёрдохи) шагналай һүүлээр.
Тус мүрысөөнэй дүнгүүдээр гурбадахи һуури Дулдаргын аймагай Алханын дунда һургуулиин Цырегма Дашиева эзэлээ. Тэрэ тус мүрысөөн тухай тодорхойгоор хөөрөөд үгэһэн байна.
- Цырегма Ракшаевна, энэ конкурсдо хэды багшанар хабаадааб?
- Мүрысөөндэ Монгол ороной, Эрхүүгэй можын, Забайкалиин хизаарай, Буряад республикын аймагуудай болон Улаан-Үдэ хотын дунда һургуулинуудай буряад хэлэнэй 32 багшанар хабаадаа. Хитадай Шэнэхээнһээ хоёр багшанар мэдүүлгэ бэшэһэн аад, ерэжэ шадаагүй.
- Забайкалиин хизаарые хэды хүн түлөөлөөбта?
- Аймаг бүхэнһөө нэгэ багша гэжэ хэлэхэдэнь, дүрбэн багшанар ошообди. Эдэ бол: би, тиихэдэ Могойтын гурбадахи дунда һургуулиин Ирина Олеговна Галсанова, Агын аймагай Һүдэнтын дунда һургуулиин Мыдыгма Ринчиновна Балданова ба Агын нэгэдэхи дунда һургуулиин Баира Дашинимаевна Балдандоржина.
- Тус мүрысөөн хэды шатаһаа бүридөөб?
- Түрүүшын үдэртэ Буряадай багшанарай колледж соо мүрысөөнэй нээлгын баяр ёһолол, багшанартай танилсуулга үнгэрөө. Үглөөдэрынь мүрысөөнүүд эхилһэн байна. Нэн түрүүн, хүн бүхэн табан минутын туршада буряад хэлэнэй баялиг харуулжа, өөртэеэ танилсуулга хээ. Эндэ бидэ түрэлхи хэлэн дээрээ уранаар шүлэг хөөрэжэ, уян нугархайгаа харуулжа, хонгёо хоолойгоороо дуу гүйсэдхөөбди.
Тэрэнэй удаа жээрэб татаад, Буряадай үндэһэтэнэй 1-дэхи лицей-интернадай ба 29-дэхи буряад гимназиин хүүгэдтэ хэшээлнүүдые үнгэргөөбди. Намда «Юумэнэй нэрын нэгэнэй ба олоной тоо» гэһэн сэдэб тудаа. Лицей-интернадай хүүгэд хэшээлдээ эдэбхитэйгээр булта хабаадаһан байна. Тэрэнэй удаа мастер-классуудые харуулаабди. Би мүнөө сагай мобильна технологи, «QR- код» хайшан гээд һуралсалдаа хэрэглэхэб гэһэн мастер-класс харуулааб. Эдэ гурбан шатын үнгэрхэдэнь, хорин хоёр багшанар «һагшагдажа», арбан багшанар үлөөбди.
Удаадахи «Түрэлхидтэй суглаан» гэһэн шатада хүн бүхэн жээрэб татажа, һурагшатай ямар нэгэ ушар тохёолдобол, багша ямар арга хэрэглэхэ ёһотойб гэһэн асуудалда харюусаабди. Шиидхэгдээгүй асуудалнуудые гаргаад, тэдэниие усадхахын тула ямар арга боломжонууд байнаб гэжэ гэртэхинтэй хөөрэлдөө эмхидхээбди. Тиигээд энэ суглаанай һүүлээр дүрбэн багшанар үлөөбди. Жюриин 18 гэшүүдэй урда дүрбүүлээ һуугаад, нэгэ сагай туршада «Багшын омогорхол» гэһэн сэдэбээр найруулга бэшээбди. Удаань тэрэнээ уншажа хамгаалаабди. Иимэл табан шатаһаа мүрысөөн бүридөө.
Дэлгэрэнгыгээр 52-дохи дугаарта.
