Агын Буряадай тойрогой Захиргаанай социальна хүгжэлтын таһагай хүтэлэгшэ мэргэжэлтэн-эксперт Ринчин Гармажапов залуушуулай ажаябуулга эрхилхэ үүргэтэй юм. Бишэн жэлэй түгэсхэлдэ һайн үүсхэл гаргадаг залуушуулай ударидагшатай уулзажа, ажал хэрэгээрнь һонирхобобди.
Ёохор наадан Ага тосхоной талмай дээрэ.
- Ринчин Чойжиевич, тон удхатай хэмжээ ябуулганууд тухайгаа хэлэжэ үгыт даа.
- 2016 ондо Забайкалиин хизаарай “Жэлэй эрхим оюутан” гэһэн конкурс һэргээгдэжэ, тойрогой эрхим оюутад суглараа, эрхимүүдынь элирүүлэгдээ. Буряадай гүрэнэй университедтэ һурадаг алиш талаһаа талаан бэлигтэй оюутан, Гүнэй нютагай Очир Маюров Россиин Президент В.Путинай гар табилгатай дипломдо ба 30000 түхэриг шанда хүртөө.
«Ага тосхон» хотын тойрогой залуушуулай зүблэлэй түрүүлэгшэ Елизавета Вырупаева Забайкалиин хизаарай эрхэтэдэй хуралдаанай «Социальная звезда» гэһэн конкурсын лауреат болоо.
- Үшөө ямар хэрэг үүсхэгдээб?
- Агын тойрогто бадминтоноор мүрысэдэг, һорилго хэдэг болообди. Тамирай шэнэ зүйлөөр һонирходог хүнүүд олон боложол байна. Агада ба Могойтодо бадминтоной секцинүүд нээгдээ, Дулдаргада hорилго эхилхэеэ байна. Шэтэ хото, Хитад гүрэн ошожо, мүрысөөнүүдтэ хабааданабди. Могойто hууринай Баир Батуев Забайкалиин хизаарай гурба дахин чемпион болоо. Шэнэ жэлдэ, январиин 5-6-да Ага тосхоной тамирай бэлэдхэлэй түбтэ бадминтоноор мүрысөөн үнгэргэгдэхэ, 50-яад тамиршад хабаадаха.
- Залуушуул, таанар хэр зэргэ түрэлхи хэлэеэ, ёhо заншалаа анхарна гээшэбта?
- Сагаалганай һайндэртэ, февралиин 9-дэ буряад хубсаһаяа үмдэжэ, урма баяртайгаар ехэ ёохорой дүхэригтэ гараа һэмди. Тойрогто ёохор наадан залуушуулай түһөө түсэбөөр бэелүүлэгдэдэг. Саашадаа арадайнгаа ёохор нааданда эдэбхитэйгээр хабаадахабди.
Могойтын аймагта нёдондо жэл буряад хэлэн дээрэ хүхюун һүбэлгэнүүдэй мүрысөөн (КВН) үнгэргэгдөө бэлэй. Тэндэ Ага-Хангилай, Догойн, Ушарбайн, Зугаалайн, Сагаан-Шулуутайн, Хара-Шэбэрэй дунда hургуулинуудай hурагшад буряад хэлэндээ бэрхэ байһанаа харуулаа. Энэ конкурсдо Могойтын дунда hургуулинуудай hурагшадай хабаадаһаниинь һайшаалтай, түрэлхи хэлэеэ мэдэхэ хэрэгтэнь туһатай. Мүнөө буряад хэлэеэ дээшэнь үргэе гэжэ залуушуул хөөрэлдэдэгбди. Иимэ конкурс 2017 оной hуралсалай шэнэ жэлдэ хараалнабди.
Ага тосхоной үндэһэн тамирнуудаар бэлэдхэлэй түбэй (ЦСП) байгуулагдаhаар 10 жэлээр дашарамдуулан, жэнхэни буряад шагай наада декабриин 23-да эмхидхээбди. Энэ наадан зоной hонирхол татана. Бүгэдэ буряадай «Алтаргана» фестивальда шагай наадаар 40 командын дунда Агын тойрогойхид шангай бүхы түрүү hууринуудые эзэлээ hэмди.
Дэлгэрэнгыгээр 52-дохи дугаарта.
