Yзөөн нютагай Дарима Дондокова дээдэ эрдэм шудалжа, багшын бэлэн бэшэ ажалда бэеэ зорюулһан хүн юм.

Мүнөө наhанай амаралтада байхадаа, Дарима Банзаракшаевна ниитын хэрэгтэ арга шадалаараа хабаададаг. Тэрэ Бүгэдэ буряадай «Толон» газетын захил эмхидхэжэ, олондо туhатай ажал бүтээнэ. «Одоо бэрхэ, нарин нягта хүн даа», - гэжэ нютагайхидынь хэлсэдэг. Ушар юуб гэхэдэ, Д.Дондокова долоон хоног бүри Дулдарга hуурин таһалгаряагүй ошожо, «Толон» газетэ нютагайхидтаа асаржа, жэншэдгүй тараадаг. Тиихэдээ Yзөөнэй хэлхеэ холбооной байшанай нэгэ таhалга соо түхеэрэгдэһэн адяар дээгүүр «хүүгэдэй сэсэрлиг», «захиргаан», «hургуули» гэхэ мэтэ гаршагуудые бэшэжэ, гэзетэнүүдые хубаарилжа табидаг. Захил хэгшэд ерэжэ, эхэ хэлэтэ хэблэл дуратайгаар абадаг гуримтай болоо. Нютагайхидынь «Толоной» удаадахи дугаар тэшэ ядан хүлеэдэг. Дарима Банзаракшаевна хүндэ анхаралтайгаар хандажа, газетыень бүрин бүтэнөөр дамжуулхые оролдодог, мүнгыень саг соонь суглуулдаг. Һуралсалай гуламтада олон жэлэй туршада хүдэлһэн багшал хадаа «Толон» газетын удха шанарыень ургажа ябаhан үетэндэ, хүн зондо ойлгуулхадаа бэрхэ, «хүндэ хэрэгтэй, гоё, hонин хэблэл» гэжэ хэлэдэг, захил хэхыень hануулдаг, туhатай зүбшэл, заабарияа хэлэжэл байдаг. Шабинарынь өөhэдөө дүршэлтэй багшанар боложо, эрдэм hуралсалай элдэб гуламтануудта ажалладаг. Жэшээнь, Эрдэм Очиров Санкт-Петербургын дунда hургуулида тоо бодолгын хэшээл заадаг юм.

«2012 онhоо «Толон» хэблэлэй захил эмхидхэжэ байнаб. Yзөөн нютагай үндэр наhатан - Лодой Найдаров, Александр Сергеев, Гончик Жамсаранов, Цыпелма Жигжитжапова, Сэндэма Мункуева, Лхамажаб Цыриторова ба бэшэн буряад хэлэтэ газетэ үнинэй захидаг, эдэбхитэй уншагшад. Би өөрөө ном hудар, газетэ, сэтгүүлнүүдые уншаха дуратайб. Аба эжын алтан hургаал, ёhо заншал сахижа, үндэһэн хэлэеэ бүрин бүтэн байлгахын тула «Толон» газетэ захижа уншагты гэжэ нютагайхидтаа ходо хэлэжэ байдагби», - гэжэ Дарима Дондокова онсолон тэмдэглээ hэн.

 

Дэлгэрэнгыгээр 52-дохи дугаарта.

You have no rights to post comments