Зарим зоной, илангаяа залуушуулай дунда бэеэ татуировкоор «хушаха» һайшаагдадаг болонхой. Үбгэ эсэгэнэрнай энээниие лаб буруушааха һэн гэжэ һанамаар.
Татуировко хадаа ганса гоёолто гү, али өөрыгөө бусадһаа онсолхо зүйл бэшэ гэжэ ойлгохо ушартай. Тэрэ өөрын онсо удха дааһан байхадаа, зарим ушарта һүр һүлдэ, оюун ухаа, үрэжэл, найдал, сүлөө, золтой заяан г.м. һайн юумэнэй һүлдэ болодог, нүгөө заримдаа муу юумэ тэмдэглэдэг. Жэшээнь, tattooha.comсайтын баримтаар, Африкын отогууд (племена) скорпиондо ондо ондоогоор хандадаг. Нэгэ талаар, тэрэниие үхэл гү, али үһөө (месть) һүлдэлнэ гэжэ этигэдэг, нүгөө талаар, бэхи бата зориг тэмдэглэнэ гэжэ сэгнэдэг ха. Мүн тиихэдэ хулгайшадай, хэһээлтын газараар ябаһан зоной, эрдэм номгүй, һургаалгүй, байдал муутай гэртэхинтэй эдиршүүлэй болон залуушуулай г.м. дунда дэлгэрэнги татуировконууд бии. Тиимэһээ иимэ тэмдэгүүдэй һайн, муу зүнгыень хүсэд мэдээгүй аад, бэеэ «эреэлхэеэ» болгоомжолхоор. Гадна бэедээ татуировко табюулхань үбшэнтэй, хожом һалгахань хүндэ хүшэр, шэрэһээнь аллерги боложо болохо, жэшээнь, бамба сэсэг анхан гоё, эли тодо һаа, үтэлхэдэ, сэсэгэй хэлбэринь (контур) алдагдаха, өөрөө сэсэг уршагар болохо г.м. хараадаа абажа, бэедээ тэмдэг хүүлэхээр гү, али үгы гү гэжэ һайса шүүхэ, бодохо хэрэгтэй. Ямаршье нүгэл хилэнсэг хээгүй, хөөрхэн, сэбэрхэн аабагар жаахан таанадта эжынэрэйтнай наһа бэлэглээ хадань, бэедээ ямаршье үзүүртэй, хадхууртай юумэ хүргэнгүй, энээхэн лэ зандань абаад ябыт даа, «гоё һайхан» гэһэн ойлгосо хизаартай байха ёһотой гэжэ һануулха дуран хүрэнэ.
Долгор РАДНАБАЗАРОВА бэлдэбэ.