Тамирай мастерай нэрэ дээрэ тогтонгүй...
Россиин Тамирай яаманһаа олимпийцүүдые бэлдэдэг хизаарай тамирай 3-дахи һургуулиин хүмүүжэмэл Инесса Намсараева һур харбалгаар тамирай мастер болобо гэһэн баяртай мэдээсэлтэй бэшэг ерээ. Тиигэжэ тойрогой тамиршадай дунда үшөө нэгэ тамирай мастер бии болобо гээшэ.
Инесса Ага тосхоной 1-дэхи дунда һургуулида 9-дэхи анги дүүргээд, Агын багшанарай колледждо һурана. Тэрэ арбан хоёртой байхадаа, һур харбаанай секцидэ ябажа эхилһэн. Һур харбалгаар бэрхэ һоригшо, уласхоорондын классай тамирай мастер Нима Балдановта заалгана. Нима Доржиевич таба-зургаан жэл соо Инесса болон бусад хүбүүд, басагадые дээдэ гарай һуршад болгожо шадаа.
Инесса «Тамир» байшан соо үдэрэй хоёр дахин һорилго хэдэг. Ехэ мүрысөөнүүдэй урда тээ амаралтын үдэрнүүдтэ сугларжа, һур харбадаг байна. Россиин габьяата һоригшо Зорикто Цыденов эдир тамиршадые, тэрэ тоодо Инессые һур харбаанай дүримүүдтэ һургадаг. Дүй дүршэлтэй һоригшодһоо заабари, зүбшэл абахадаа, Инесса бэрхээр харбажа һурана. Тойрогой, хизаарай мүрысөөнүүдтэ хабаадажа, шангуудта хүртэжэ, һоригшодоо, гэртэхинээ хүхеэдэг. Удангүй Нима Доржиевич һоригшотоёо үндэр хэмжээнэй мүрысөөнүүдтэ хабаадажа, дүршэлтэй болоо. Түрүүшээр илагшадай тоодо ороогүйшье һаа, Инесса алдуу эндүүгээ ойлгожо, хэшээл абажа, удангүй Россиин мүрысөөнүүдтэ шүүжэ эхилээ бшуу.
Дүрбэ-табан жэл соо залуу басага-най шүүгээгүй мүрысөөнүүд үгы шахуу. Нёдондо Россиин Генеральна Прокуророй шанда хүртэһэн габьяатай. Байгша ондо Орёл хотодо эдир хүбүүд ба басагадай хоорондо һур харбалгаар Россиин мүрысөөндэ мүнгэн медальда хүртэһэн байна. 18 наһа гүйсөөдүй басагадай хоорондо финалда Инесса Намсараева нютагайнгаа Александра Цыденовада шүүгдэһэн. Инесса тамирай хажуугаар ном уншаха, мозаика суглуулха дуратай юм.
(Үргэлжэлэлынь 12-дохи дугаарта).
Эрдэни ЧИМИТДОРЖИЕВ.
