Могойто тосхондо «Толон» газетын олон жэлэй туршада үнэн сэхээр захил эмхидхэжэ байдаг Наталья Арданаевна Юндунова тухай мүнөөдэрэй хөөрөөн.
Тэрэ Оловяннын аймагай Ононск нютагта 1956 ондо Амгаланай Ардана ба Юндэнэй Хандама хоёрой гэр бүлэдэ түрэһэн юм. Абынь тоонто нютаг Могойтын аймагай Сүүгэл болоно. Эжынь Оловяннын аймагай Шаранайн юм. Наталья Арданаевнагай бага балшар наһаниинь хүдөөдэ үнгэрһэн, аба эжынь хонишод ябаһан.
Наталья Арданаевна ажалайнгаа намтар Эрхүүгэй можын Усть-Илимск хотын почтодо эхилһэн. 1979 ондо Могойто тосхон зөөжэ ерээд, эндэхи почтын ажалтан болоо. 1990-ээд онуудта ажалһаа хаһагдажа, «Агын правда» һониной захил эмхидхэгшээр хүдэлжэ эхилээ. Тэндэ 20-ёод жэл хүдэлнэ бшуу. Түрүүшээр Могойто тосхоной почтын хуушан байшанда, һүүлээрнь военкомадай байшан соо ажаллаа. Мүнөө һуудаг байшанда 2009 ондо ороһон юм. «Толон» һониной захил эмхидхэгшээр 2013 онһоо хүдэлнэ.
Наталья Арданаевнагай наһанайнь нүхэр залуугаар гээгдэһэн. Хоёр хүүгэдые үндылгэнэ. Ехэнь - Алдар хүбүүн Бооржодо контрактаар сэрэгэй алба хаана, Виктория басаганиинь Эрхүүгэй гүрэнэй дээдэ һургуулиин 5-дахи курсын оюутан юм. Наталья Юндуновагай аха, эгэшэнь Улаан-Үдэ, Шэтэ хотонуудта ажаһуудаг. Амаралтадаа тэдээндээ айлшалаад ерэдэг шуу.
«Ажални бараг, пенсидэ гараһаар, табан жэл боложо байнаб. Газетэнүүдые саг соонь асардаг, тэдэниие тараажа, хүн зонтой хөөрэлдэжэ һуудагби. Захидаг хүнүүдэй тоо үсөөржэ байдаггүй, ехэнхидээ наһатайшуул, дунда наһанай зон, һая ниилэһэн нэгэ хэды залуу гэр бүлэнэр захидаг. Үнинэй уулзаагүй үбгэд хүгшэд эндэ ерээд, амараад, һонинѳѳ хөөрэлдөөд ошодог. Мүнөө Могойто тосхондо «Толон» һонин зуу гаран хүн захина. Хүдөө нютагуудай захиргаанууд эндэһээмнай газетэнүүдээ абаашадаг. Гэрни эндэһээ холо бэшэ», - гээд Н.Юндунова энеэбхилэн хөөрэнэ һэн.
Ажалайнь газар сэбэрхэн, дулаахан, сонхо дээгүүр олон гоё сэсэгүүд ургана. Ороһон хүниие дулааханаар, уринаар угтан абадаг, зохид номгон зантай ажалтан байна гэжэ Наталья Арданаевнае тэмдэглэхээр.
Дэлгэрэнгыгээр 47-дохи дугаарта.
