ТҮҮХЭҺЭЭ
Базар Ринчиногой нэрэмжэтэ Агын багшанарай колледжын захиралаар 2022 оной сентябрь һараһаа хүдэлжэ байһан Соёлма Мункуеватай уулзабабди. «Сансара» ансамблиин ажабайдалаар һонирхоходомни, папкануудые барюулба. Хэдэн жэлэй хугасаада «Агинская правда», «Агинское сегодня», «Толон» газетэнүүдтэ гараһан мэдээсэлнүүд тэрээн соонь согсолоотой. Тодорхойлходо, ансамблиин түүхэ, хүгжэлтэ, багшанарай болон ансамбльда ябаһан оюутадай нэрэ обогууд, тэдэнэй фото-зурагууд, элдэб конкурснуудай диплом болон грамотанууд байгаа. Тодорхойлходо, 2008 оной «Толон» газетын 51-дэхи дугаарта «Сансара» ансамблиин хүгжэмэй хүтэлбэрилэгшэ Светлана Базарова «Сансара» – оюутадай дуу хатарай ансамбль» гэһэн толилолго хэблүүлһэн байна. Светлана Базарова тэрээн соогоо ансамблиин нээгдэһээр табан жэл үнгэрһэн тухай тэмдэглэнэ. «Мүнөөдэр «Сансара» ансамбль һайн материальна баазатай. Хореографиин классһаа гадуур костюмернэ ба багшанарай таһагууд, өөрын автобус бии...» гээд тэрэ бэшэһэн байна. Хажуугаарнь Г.Ц.Цыдынжаповай нэрэмжэтэ Буряадай гүрэнэй оперо ба баледэй академическэ театрай дуушан, Зүдхэли нютагай Саян Цымпилов, Улаан-Үдын «Байгал» театрай дуушан, Зугаалай нютагта тоонтотой Чимит Санжимитупов, «Түхэриг» гэһэн видео-түлэблэлэй автор, шоумен, Хүһөөшэ нютагай Ким Харганаев гэгшэдэй тэндэһээ далижан гараһан тухай хэлэгдэнэ.
«Агинская правда» газетын сурбалжалагшаар хүдэлһэн Ни-ма Дашицыренов буддын шажанай гүн ухаанай доктор Бабу ламын (Владимир Чимитдоржиев) ансамбльда «Сансара» гэһэн нэрэ үршөөһэн, БГУ-гай Б.Ринчиногой нэрэмжэтэ Агын багшанарай колледжын, Агын филиалай ба Агын эмнэлгын колледжын талаан бэлигтэй 240 оюутад энэ ансамблиин гэшүүд боложо, 336 янза бүриин хатар, дуу бэлдэһэн тухай мэдээсэнэ.
2013 ондо «Сансара» ансамбль «Сказание о вечной любви» гэһэн дуутай ба хатартай зүжэг түрүүшынхеэ табижа, Улаан-Үдын «Студенческая весна БГУ-2013» гэһэн фестивальда хабаадаад, «За высокое исполнительское мастерство» ба «За сохранение национальных обычаев и традиций» гэһэн дипломуудта хүртэһэн. Энэ зүжэгэй гол дүрэнүүдые наадаһан оюутад гэхэдэ, БГУ-гай Агын филиалай Аюша Дамдинов ба Сэсэг Махазагдаева.
Валентина ЦЫРЕНЖАПОВА.
