Хара суба, һарабшатай малгай үмдэһэн набтархан наһажаал үбгэнэй бэшэһэн юумэеэ бари-һан, редакци руу оло дахин ябадаг байһаниинь һанагдана. Уран зохёолнуудаа, шүлэгүүдээ эхэ хэлэтэ «Толон» һониндо саг үргэлжэ толилуулдаг байгаа бшуу. Бэшэхэ, зохёохо гэһэн бурханһаа үршөөгдэһэн бэлигтэй ахатан наһан соогоо олон шүлэг, рассказуудаа ном болгожо, суглуулбаринуудые хэблүүлжэ, хэдэн үе зоной уншаха, үзэхэ хэрэгтэ асари ехэ хубитаяа оруулһан гээшэ. Арсалан Жамбалон Шэтын можын, Агын тойрогой, Үбэр Байгалай хизаарай уран зохёолой түүхэдэ нэрээ мүнхэлһэн юм. Уран зохёолшо залууһаа эхилжэ, һүүлшынгээ үдэр хүрэтэр буряад арадтаа зорюулһан зохёолнуудаа бэшэһээр, хурса гуурһаяа гартаа бариһаар лэ ябаһан.
Арсалан Жамбалон байгаалиин һэргэжэ, набша намаагаа дэлгээжэ байха үедэ алтан дэлхэй дээрэ мүндэлһэн юм. Түрэһэн нютагынь Могойтын аймагай Ага-Хангилай Хулинда гэжэ нангин газар болодог. Энэ газарhаа холо ойгуур мэдээжэ болоһон олон бэлигтэй «одод» ба баатар хүбүүд гараhан. 1926 ондо Балма эжынь дүү хүбүүн Дамдинай Жамбалтанда Арсалан хүбүүгээ үгэһэн байна. А.Жамбалон Жамбал абынгаа нэрэдэ орожо, Аргали нютагта үндыгөө. Уран зохёолшын эдир наһаниинь хүндэ хүшэр гушаад онуудай хамалган соогуур үнгэрөө. Тэрэ сэрэгтэ татагдахын урда тээ колхоздоо энэ тэрэ ажал хэжэ ябаhанаа, 1942 ондо эрэ хүнэй уялгата албанда абтаhан байна. Эрхүүгэй можын Мальта станцида миномётно батальондо алба хэжэ, Эхэ ороноо хамгаалхаяа Зүүн дайнда батальонтоёо эльгээгдэhэн. 1945 ондо милитарис Японтой дайнай эхилхэ үедэ албанда байhан Арсалан Жамбалон Алас Дурнын фронтын бүридэлдэ оробо. Августын 9-эй hүни добтолго эхилжэ, танкын, артиллериин болон мотострелково полкнуудайнгаа хүсэ шадамараар хэрэглэн, дайсанай бэхилмэл хэрэмүүдые бута сохижо гаралсаа. Байлдаанай табан үдэр соо Квантун армиин бэхилэгдэhэн эгээ томо хото городууд булимтарагшадhаа сүлөөлэгдөө hэн. Сентябриин 2-ой үдэр милитарис Япониин капитуляцида ороhон тухай актда гар табигдажа, дайн дүүрэhэн түүхэтэй.
Эрдэни ЧИМИТДОРЖИЕВ.
Буряад уран зохёолдо мүр сараа үлөөһэн
- Информация о материале
- Автор: Эрдэни ЧИМИТДОРЖИЕВ.
- Категория: Улаалзай
- Просмотров: 65