Буряад соёлой хэдэн һалбарида горитой хубитаяа оруулһан Норпол Очиров 1930 ондо элдин Догой нютагта Аюшын Ошорой болон Балданай Балдулмын бүлэдэ 4 хүүгэдэй ехэнь боложо түрэһэн.
   Абань Эсэгэ ороноо хамгаалгын Агууехэ дайнда 4 жэл дайлалдажа, Европо хүрэтэр ябаһан. 1945 оной майн 8-да Берлиндэ шархатаһан байна. Гэртээ 1945 оной эсэстэ энгэртээ Улаан Одоной ордентой бусаһан. Эжынь энэ үедэ Агуу Илалта шэрээлсэжэ, ара талада эсэшэ сусашагүй ажаллаа бэлэй. Залуугаар наһа бараа һэн, нютагайхидтаа жэгтэй һайхан сэдьхэлтэй гэжэ хадуугдаһан.
   Дайнай һүүлээр ажабайдалай хүндэ байбашье, гэртэхиниинь хүүгэдтээ һургуули хүүлэхэ гэжэ оролдоһон. Хүүгэдыньшье өөрэ өөдэргэ, һүбэлгэн бэрхэ байһан. Цыдып хүбүүниинь залуугаар наһа бараһан. Балма басаганиинь Хара-Шэбэрэй дунда һургуулиин эхин шатын ангинуудай хүүгэдтэ олон жэлэй туршада эрдэм мэдэсэ олгоһон, гадна һуралсалай талаар захиралай орлогшоор, профсоюзай хорооной даргаар ажаллаһан, багшын ажалай ветеран юм. Мункожаб дүүнь олон жэл Буряад радиодо сурбалжалагшаар, Буряад Уласай Юрэнхылэгшын Захиргаанда оршуулагшаар, буряад хэлэнэй хэлтэс даагшаар хүдэлөө. Буряад хэлэнэй хүгжэлтын гүрэнэй программануудые зохёон бэлдэһэн байна.

You have no rights to post comments