«һАНАНАБДИ! БАЯРТАЙБДИ!»
Һайндэртэ сугларһан Дорнод аймагай ажаһуугшад болон айлшад – бүхыдөө 15 мянга тухай хүн Мүнх Хэт гэһэн сэрэгэй полигон дээрэ эмхидхэгдэһэн ород-монгол сэрэгшэдэй «Сэлэнгэ-2019» гэһэн һуралсал хараха аргатай байба.
Сүлөөтэй байһан Россиин сэрэгшэдые харахадаа, хүүгэдээ тэбэрюулээд фото-дүрыень абахаяа һанаһан аба эжынэрэй оошор болошоод байха юм. Һайндэрэй хэмжээ ябуулга бүхэндэ эмхидхэгшэдынь 80 жэлэй саана туйлаһан илалтын түлөө манай гүрэндэ баяртай байһанаа ходо хэлэжэ, харуулжа, хөөрэжэ байгаа.
СОВЕТ СЭРЭГШЭДЭЙ ЗАМААР
Соносхогдоогүй Халхын голой байлдаан 1939 оной май һараһаа сентябрь болотор үргэлжэлһэн юм. Байлдаанай һүжэрһэн шалтагаан гэхэдэ, Хитадай хойто газарнуудые эзэмдэһэн Япони тэндэ Манчжоуго гэһэн марионеточнэ гүрэн байгуулһан, Монголой газар дэбисхэртэ һанаашархаад байгаа. Тиихэдэнь СССР Монголой тала баряа бшуу. Совет-монгол сэрэгшэдэй добтолго 1939 оной августын 20-до эхилээд, сентябриин 15-да СССР, Монгол ба Япони гүрэнүүдэй хоорондо саг зуурын эблэрэл баталагдаһан түүхэтэй.
Энэ байлдаанда хэды совет сэрэгшэд хосорһон бэ гэжэ мүнөө болотор элирүүлэгдэһээр, бэдэрэлгын ажал ябуулагдаһаар. Ородой Уласай Хамгаалгын яаманай сайтда мэдээсэһээр, японтон-манжуурай талаһаа алуулһан, шархатаһан болон плендэ абтаһан сэрэгшэдэй тоо 61 мянга гаран, харин совет-монгол талаһаа - 26 мянга гаран болоһон байна.
Япони Халхын голой байлдаанда шүүгдэһэнэйхиие Дэлхэйн хоёрдохи дайнай үедэ СССР-тэ добтолхоёо арсаһан юм гэжэ мүнөө түүхэ шэнжэлэгшэд тоолоно.
Тэбхэр наян жэлэй саана совет сэрэгшэд Халхын голой байлдаанда мордоходоо, Ульханаар хилэ гаража, ябагаар 600-гаад модо зай гаталһан байна. Совет сэрэгшэдэй энэ габьяаень мүнхэлжэ, баатаршалгадань хүндэеэ мэдүүлжэ, ород-монгол хилэһээ – Ульханһаа Халхын гол хүрэтэр гүйдэлэй эстафетэ августын 29-дэ эхи абаа. Энэ хэмжээ ябуулга Монголой Хүнгэн атлетикын федераци, Дотоодын хэрэгүүдэй ехэ һургуули болон тамуужанай хүдэлмэрилэгшэд эмхидхэһэн байна. Федерациин түлѳѳлэгшэ, Улаан-Баатарта хүнгэн атлетикээр һоригшо Даваасүрэнэй (зураг дээрэ - наада таладань) хэлэһээр, замдань нютаг бүхэнһѳѳ гүйдэлшэд эстафетэдэ оролсохо юм.
