Иимэ аюулта байдалһаа дулдыдажа, һургуулиин һурагшад элүүржүүлгын булан ерэжэ, зунайнгаа амаралта хүхюун зугаатайгаар ба ашатайгаар үнгэргэхэ аргагүй байна бшуу. Зүгөөр бэеэ амяарлаад байлгын (самоизоляция) гуримай үнгэрхэдэ, хүүгэдэй лагерьнуудай хүдэлхэ хаһа заабол нээгдэхэ бшуу. Жэл бүри тойрогой засаг зургаануудай хүтэлбэрилэгшэд үхибүүдэй амаралгада онсо анхарал хандуулдаг юм. Тойрогой Захиргаанай социальна хүгжэлтын таһагай дарга Розалия Балдоржиевагай хэлэһээр, пандемиин үедэ хүүгэдэй амаралгада онсо анхарал хандуулагдаха. Аймагуудаар оршодог элүүржүүлгын лагерьнуудта дүн хамта долоо мянга гаран үхибүүдые амаруулхаар түсэб табигдана. Мүн тиихэдэ хүдөө нютагуудай һургуулинуудта үдэрэй халаанай лагерьнууд хүдэлжэ эхилхэ юм. Август һарада, халдабарита үбшэнэй буурахада, хорин нэгэн үдэрэй туршада лагерьнууд хүдэлхөөр хараалагдана. Бүхыдөө тойрогой 54 эмхи зургаанда лагерьнууд ажалаа ябуулха юм.

Ээлжээтэ амаралгын халаанай эхилхэһээ урид эрдэм hуралсалай, социальна таhагуудай, Роспотребнадзор, МЧС, түймэр сарадаг албангуудай мэргэжэлтэд тойрогой «Наран», «Нарһан», «Дружба», «Аршаан» лагерьнуудаар ябажа, амарагшадые элдэб халдабарита үбшэнгүүдhээ, хашагhаа, түймэрэй аюулhаа hэргылхэ талаар хэмжээнүүдые шалгаха юм. Илангаяа пандемиин үедэ мэргэжэлтэд үе-үе болоод ябажа шалгажа байха бшуу. Халдабарита үбшэнһөө һэргылжэ, үдэр бүри амаралгын булангуудта дезинфекци үнгэргэгдэжэ байха гэжэ хэлэгдэнэ.
Лагерьнуудта зунай сагта үхибүүдые алишье талаар хүгжөөхэ, бэе махабадыень хүдэржүүлхэ программануудаар ажал ябуулагдахаар тү-сэблэгдэнэ. Программа дотор үхибүүдые дуу хүгжэмдэ, хатарта, тамирай янзануудта hургаха хэмжээнүүд оронхой. Һургуулиин hурагшадай зунай амаралта зүбөөр эмхидхэхэ зорилгодо хизаарай Эрдэм hуралсалай яаманай шугамаар мүнгэн hомологдожо, лагерьнууд хүдэлдэг гээшэ. Амарагшад үдэрэй 4 дахин халуун хоолоор хангагдаха. Эдеэ хоолой зүйлнүүдые хаанаһаа абаха тухай, лагерьта хүдэлхэ зоной асуудал мүнөө үедэ шиидхэгдэнэ. Тогоошод, эмшэд ба бусад мэргэжэлтэд ажаллаха юм. Лагерьта амарагшад физзарядка, бэе махабадаа элүүржүүлгын hорилгонуудые гараха. Тодорхойлходо, хүнгэн атлетикээр, мини-футболоор, волейболоор, теннисээр, пионерболоор, канат таталгаар мүрысөөнүүд, уран һайханай, соёлой конкурснууд эмхидхэгдэхэ. Уран зурагай кружогта амарагшад уһан шэрээр, гуашаар уранаар зуража, пластилинээр, шабараар, саарhаар элдэб түхэлэй зүйлнүүдые бүтээжэ һураха бшуу.

Лагерьнуудта амарагшадай ашада душ, бани, hорилгын, теннис наададаг, релаксациин, киноконцертнэ танхим, хатардаг талмайнууд ашаглагдаха. Бассейн ошожо, дуран соогоо тамарха, сэнгэхэ аргатай. Жэшээлхэдэ, Ага тосхоной «Баатар» элүүржүүлгын түбэй инструкторнууд эдиршүүлые «Нарһан» лагерьта тамаруулжа hургадаг. Зарим багашуул амаралгын буланда 21 үдэр байхадаа, гэрээ, гэртэхинээ һанажа болохо. Гэртэхинтэеэ үдэр бүри харилсажа байха талада хэлхеэ холбоон бии болоо. Үмсын харуулай эмхиин хүдэлмэрилэгшэд амаралгын булан үдэр hүнигүй нягтаар харууhалха. Мүнөө үедэ лагерьнуудта санитарна сэбэрлэлгын хүдэлмэринүүд хэгдэнэ.

You have no rights to post comments