Сентябриин 25-да «Ага тосхон» хотын тойрогой архивай байшан соо «История в судьбах земляков-агинчан» гэһэн архивна материалнуудай үзэсхэлэн дэлгээгдээ. Үзэсхэлэндэ зон Шэнэ Орловск, Согто-Хангил, Хара-Шэбэр, Табтаанай, Балжана нютагуудай түүхэ; орденто эхэнэрнүүд, Ажалай Баатар Бальжинима Мажиевай болон габьяата хүдэлмэрилэгшэдэй хубиин дансанууд; суута зондо зорюулагдаһан альбомууд болон дайнай ба ара талын ажалай ветеранууд тухай материалнуудтай танилсаха аргатай. Һүүлээрнь ДалиТЭ театрта «Родная Ага» форсайт-наадан Агын тойрогто ажал хэдэг залуу үетэнтэй 4 шэглэлээр үнгэргэгдэбэ. Эдэ хэмжээ ябуулгануудта хүндэтэ айлшад: сенатор Баир Жамсуев ба Агын Буряадай тойрогой толгойлогшо Буянто Батомункуев хабаадана.

Сентябриин 26-да «Агын Буряадай тойрогой орденгууд» стеллын дэргэдэ  Агын Буряадай тойрогой байгуулагдаһан үдэртэ зорюулагдаһан баяр ёһололой митинг үнгэргэгдэхэ. Удаань Г.Цыбиковэй нэрэмжэтэ Агын үндэһэтэнэй музейн дэргэдэ гүрэнэй ниитэ ажаябуулагша, бодото статска советник, гадаадын харилсаанай талаар ажалладаг мэргэжэлтэн, эрдэмтэн, түбэд эмнэлгын доктор, үмсын хэрэг эрхилэгшэ, меценат Петр (Жамсаран) Бадмаевта зорюулагдаһан бюстын нээлгэ баяр ёһололой оршондо үнгэргэгдэхэ. Һүүлээрнь К.Базарсадаевай нэрэмжэтэ хүүгэдэй урлалай байшан соо уласхоорондын классай мастер, уласхоорондын олон турнирнуудай илагша, дүрэ буляалдаата барилдаагаар 2020 ондо Азиин чемпион болоһон Арсалан Будажаповые хүндэлэн ёһолхо юм.  

You have no rights to post comments