Алхана нютагнай гэрэлтэнэ

Үргэн сагаан мүнхэ дэлхэй дээрэ
Үлзы номин уужам дайда нэмжынэ.
Үндэр гэгээн уудам огторгой доро
Үльгэрэй орондол Алхана нютаг гэрэлтэнэ.

Хүбшэ тайгын ногоон хормой һуунагтаад,
Номгон далайн эбхэрһэн долгиндол миралзана.
Хүхэрэн гоёор һуунагтаһан сэнхир хаданууд
Намилзаһан шэдитэ даляараа тэнгэридээ тэгүүлнэ.

Ая ганга, арса хүжөөр анхилаад,
Аглаг талаар агаар дүүрэн сэлгеэтэнэ.
Ан гүрөөл, бугын урамдаан зэдэлээд,
Арюухан нютагай ой тайгаар сууряатана.

Эржэн үндэр эльгэлэн шүтэдэг Алханамнай
Энхэ тайбанай мүнхын зула бадараана.
Эршэ хүсэн эдэбхитэй арад зомнай
Эгүүритэ байдалаа сахин, урагшаа дабшана.

Алтан наранай хонхын дуун соо,
Агуу одо мүшэдэй туяан доро
Үлзы һайхан үндэр наһа эдлэжэ,
Үеын үедэ үнэр баян, жаргалтай ажаһуугыт даа.

Алхана ууламнай хэтэ үеын түшэгнай

Алтан дэлхэйн хүн түрэлтэн
Ашата бурханай үршөөл хайраар
Амгалан байдалай буян үйлэдэн,
Ая гангата нютагаа арюудханал аршаанаар.

Намнанай багшын үреэлтэй үндэртэнь
Наранай туяан нааданал энгэртэнь.
Наһанай харгы сагааруулһан мэтээр
Налгай янзаар номнонол, мүргэмөөр.

Үлзы һайханаар туяаран һолонготонол
Үндэр гэгээн Алхана ууламнай,
Үнгын сэсэгээр һалбаран надханал
Үлгы номин бурханай оромнай.

Байдалай хэсүү, орёошье һаа,
Баян дэлгэр зориг мүнхэрүүлнэл.
Байгал далайн орьёлоошье һаа,
Байсата үндэртэнь зула бадараанал.

Агын талаяа арсаар үнэржүүлэн,
Арад зоноо энхэрэн адисланал.
Амбан хүсэтэ шэдиеэ дэлбэрүүлэн,
Алгад шэртэн, байдалыень дүнгэлсэнэл.

Алхана ууламнай - хэтэ үеын түшэгнай,
Анхан гарбалай эхин нангин шүтөөмнай,
Ара халхын орон нютаг тулгууримнай,
Арьяа-Баала агуу буддын шажанай тоонтомнай.

You have no rights to post comments