Хүндэтэ айлшан, нэн түрүүн, Ивалгын дасан бараалхажа, хамба лама Дамба Аюшеевтэй уулзаһанай удаа бандида хамба лама Даши-Доржи Этигэловтэ мандал үргэжэ золгоо.

Саашадаа Ивалгын дасанай баяр ёhолой хэмжээндэ алдар суута мастер Буряадай тамиршадтай харалга-hорилгонуудые үнгэргөө. Мүн лэ Тарбагатайн аймагай шэмээшэгүүдэй үндэhэн ёhо заншалай түбтэй, Азиин арадуудай галлерейтэй танилсаа.

Удаань Стивен Сигал Буряад ороной бусад үзэсхэлэнгүүдтэй танилсажа, Байгал далай хүрэһэн байна. Тэндэ «Главрыбвод» гэhэн үйлэдбэридэ үдхэгдэhэн 2000 гаран омолиин жараахайнуудые Байгал руу табилсажа, буянта хэрэг үйлэдэбэ.

- Стивен Сигал Буряад Республикада үхибүүдые зүүн зүгэй дайшалхы урлалда hургаха ба Байгал хамгаалан аршалха хүсэлтэйгөө мэдүүлээ.

- Россиин «Алас Дурнын гектар» гэhэн түсэб хэрэглэжэ болохоб, - гэжэ Голливудай одон хэлэhэн байна. Би 40 жэлэй туршада нэгэ бизнес-проект дээрэ хүдэлнэб, тэрэнээ эндэ бэелүүлхэ зорилготойб.

«Баатарай Yргөө» гэhэн этнокомплекс соо үнгэргэгдэhэн пресс-конференци дээрэ Стивен Сигал иигэжэ хэлэhэн байна:
- Би наhан соогоо олон юумэ үзөөб, харааб. Теэд мүнөө Даши-Доржи Этигэловтэй уулзалга эгээл ехээр гайхуулаа ба зүрхэ сэдьхэлыемни доhолгоо. Би эндэ өөрынгөө гэр бүлэтэй уулзаhан мэтэ мэдэрэлдэ абтааб, юундэб гэхэдэ би монгол хэлэн дээрэ дуугардагби, буряадшье үгэнүүдые мэдэхэб. Yшөө XIX зуунhаа эхилжэ, уг гарбалаа мэдэхэб. Минии элинсэгүүд Азиhаа гарбалтай, тиигээд баруун оронууд руу ошоhон.

Саашань үргэлжэлүүлхэдээ, тэрэ иигэжэ онсо тэмдэглэhэн байна:
- Yбгэ эсэгэнэрэйнгээ бэлэглэһэн ёhо заншалнуудые, соёл, hургаалнуудые сахиха хэрэг дэлхэй дээрэ эгээл шухала зорилго болонхой. Түрэл хэлэеэ аршалан хүгжөөхэнь маша шухала. Гансал хэлэн улад түмэниие найдамтайгаар нэгэдүүлхэ аргатай. Мүнөө бэшэгдэдэг мэдээсэлнүүдэй 30 хубинь худал гэжэ эли. Харин арадай аман үгөөр дамжуулагдаhан hургаалнууд эгээл сэсэ мэргэн. Бидэ хоёр мянга гаран жэлдэ таhалдаагүй угай бэшэгтэй, хүсэтэй, баян арад гээшэбди! Yшөө бидэ нангин маани тарнинуудтайбди!

Тэрэ Буряад орондо элдэб янзын арадуудай ба шажантанай хоорондоо эбтэй эетэй ажаhуудагые баясан онсо тэмдэглээ. «Би Россиин олон булангуудаар ябажа танилсааб, гансал эндэ гайхалтай эбтэй, бэе бэеэ hайнаар ойлгодог ба хүндэлдэг хүнүүдые түрүүшынхеэ харабаб», - гэжэ актёр хэлэhэн байна.

Байгша оной эхиндэ юрист ба политтехнолог Н.Васютин Стивен Сигалые Буряад Рес-публикаhаа Гүрэнэй Дүүмэдэ hунгаха тушаа дурадхаад, Интернедээр уриhан ушартай.

Гэрhээ ехээр гаража ябахаа болиhон актёрой Буряад орон ерэhэниинь - ехэ баяртай ушар.
Стивен Сигал Москва хотын Рублёвкодо томо байшан баряад, тэрэнээ хүдэр хүреэгээр бүхэлhэн ёhото хэрэм болгоhон, мүн Москваhаа гадуур 100-гаад сая түхэригэй байшантай ха.

You have no rights to post comments