Хүмүүжэмэлнүүдэй амжалта – багшын амжалта.

Дулдаргын хүүгэдэй уран урлалай байшанай нэмэлтэ һуралсалай багша Дашинима Цыбенов тус үзэсхэлэндэ хоёрдохёо хабаадажа, «Лучший сувенир из дерева и бересты» янзада 1-дэхи шатын дипломоор шагнагдаа һэн. Гартаа дүйтэй багша дүрбэдэхи жэлээ «Деревянная мозаика» кружок ябуулжа, гурбан наһанай бүлэг хүүгэдые модоор дархалжа һургадаг.

Багшын Тагаржалсан абань Үзөөнэйнгөө колхоздо тракторист-механизатораар хүдэлжэ ябаһанаа, наһанай амаралтада гарахадаа, гэрэй эд бараа – шэрээ, ханза г.м. дархалдаг болоо һэн ха. Ламанарай захилаар дамааринуудые бүтээжэ үгэдэг байгаа. Дашинима хүбүүнэй жэшээ абаха, модошо дарханай ажалда һургаха хүн байгаа гээшэ. Тиигээд тэрэ нютагтаа дунда һургуули 1984 ондо дүүргээд, Кемеровын можодо сэрэгэй алба хаагаа. Удаань Буряадай гүрэнэй багшын дээдэ һургуули «Учитель трудового обучения» гэһэн мэргэжэлээр түгэсхөө һэн бэлэй. Дулдаргын дунда һургуулида «Резьба по дереву» кружок ябуулһан, удаань үмсөөрөө ажаллаһан.

Багшын хүмүүжэмэлнүүдэй ажалнууд Агын тойрогой дунда һургуулинуудай мастерской болон домоведениин кабинедүүдэй уран бүтээлнүүдэй, Үбэр Байгалай хизаарай хэмжээнэй «Гуранёнок» болон уласхоорондын «Детство без границ» үзэсхэлэнгүүдтэ, гадна «Алхана» үндэһэн паркын экологическа акциин хэмжээндэ үнгэргэгдэдэг «Сохраним мир птиц» г.м. конкурснуудта хабаададаг байна.

Дашинима Цыбенов хүмүүжэмэлнүүд тухайгаа иигэжэ хөөрэбэ: «Шабинарһаамни Руслан Токаревые онсо илгахаар. Тэрэ гартаа жэгтэй дүйтэй, кружогто олон жэлэй туршада таһалгаряагүй ябадаг. Жэл бүри шадабаринь дээшэлжэ, мүлигдэжэ байдаг. Тэрэнэй уран гоёор дархалһан кухниин хэрэгсэлнүүд - шабдаанууд, ганжан болон шкатулка г.м. уласхоорондын хэмжээнэй конкурсдо һайн сэгнэлтэнүүдые абаһан. Мүнөө жэлһээ нэгэ бэрхэ, урлалда абьяастай хүбүүн кружогто ябажа эхилээ. Удангүй тэрэ һайн дүнгүүдые харуулха гэжэ найданаб».

Хэзээшье, уран гартанай бүтээлнүүд ажабайдалда туһатай, саашадаа олоор үйлэдбэрилэгдэхэ ёһотой гэжэ Агын Буряадай тойрогой Захиргаанай түсэблэлгын ба шэнжэлэлгын таһаг хараалдаг. «Лучший сувенир с символикой Алтарганы-2020» янзада Дашинима Цыбеновэй фанерээр хэһэн мобильна телефоной табюур, саахарай амһарта, мүнөө жэлэй һүлдэ - хулгана г.м. олондо һайшаагдаа һэн.

Дашинима Цыбенов элдэб хэмжээнэй үзэсхэлэнгүүдтэ амжалтатай хабаададаг. Ажалдаа һайн дүнгүүдые харуулһанай түлөө Дулдаргын аймагай захиргаанай һуралсалай хорооной, аймагай захиргаанай хүндэлэлэй грамотануудаар шагнагдаһан юм.

Багша, хэзээшье, шабинарайнгаа амжалтануудаар омогорхоно. Энэнь баһал багшын амжалта ха юм. «Дашинима Тагаржалсанович багшада заалгажа, иимэ уранби» гэхэ олон шабинар гараха гэжэ найдая.

You have no rights to post comments