Эхын үдэрѳѳр дашарамдуулан, этигэл найдалаа алдадаггүй, үри хүүгэд тухайгаа ходо һанаата боложо ябадаг эжынэртээ зорюулнабди.
Цыремжит Аюшиевна Дагбаева 1955 ондо Агын аймагай Урда-Ага нютагта Аюшын Һамын гэр бүлэдэ дүрбэн хүүгэдэй одхон боложо түрэһэн. Һургуулияа түгэсхөөд, Урда-Агадаа хамтын ажахыда хоёр жэлэй туршада хүдэлөө. Тэрэ һурагша ябахадаа, хэлэндэ бэрхэ, шүлэг зохёохо абьяастай, ном уншаха дуратай һэн ха. Тиин 1977 ондо Монголой дээдэ һургуулиин монгол арадуудые шэнжэлдэг эрдэмүүдэй факультедтэ ороһон. Тэрэнээ амжалтатайгаар дүүргээд, Монголой Сэлэнгын аймагай алта малтадаг эмхидэ ород хэлэнэй оршуулагшаар хүдэлөө. Хажуугаарнь алта абадаг касса даагшаар ажаллаа бшуу. «Тэндэхи байгаали һайшаадаг һэм. Алта асархадань, тэрэниие тусхай шэгнүүр дээрэ шэгнэхэбди. Москвагай телевидениин сурбалжалагшадай ерэһыень мартадаггүйб. Алта альган соогоо һамаржа байхадамнай, бидэниие буулгаа бэлэй», - Цыремжит Аюшиевна саг тогтоогоод, тэрэ үе руу ябашаһан шэнгеэр харагдаба.
Тус эмхидэ гурбан жэл хүдэлөөд, Монголой урда талада байдаг элһэн Гоби руу эльгээхэеэ һанахадань, 1982 ондо тоонто нютагаа бусаһан юм. Тиигээд Агын хизаар ороноо шэнжэлэлгын музейдэ ажалтай болоһон шуу. Монголой, Хитадай аяншалагшадай ерэхэдэнь, тэдээндэ монгол хэлэн дээрэ экскурсинуудые эмхидхэдэг байһан. Удаань Дулдаргын аймагай Табтаанай нютагта буряад, монгол хэлэнүүдые ба хуушан монгол бэшэг заагаа. Тэндэ хүдэлжэ байхадаа, юумэ найруулан бэшэдэг болоһон. Байд гээд лэ, «Агын правдада», «Толондо» материалнуудаа эльгээдэг болоо. Нэгэтэ «Толоной» ахамад редактор Б.Шагдаров «Манай эндэ ерэжэ хүдэлыт даа» гэжэ уриһан байна. Тиигэжэ 1998 онһоо «Толондо» хүдэлжэ эхилээ бшуу. Тон түрүүн сурбалжалагшаар, удаань соёлой, уран зохёолой таһагые даагшаар ажаллаа юм. «Ямар һонин хуби заяатай хүнүүд ябадаг һэн гээшэб - шанга, эрэлхэг зоригтой, Эсэгэ орондоо дуратай, тиихэдэ хатуу сагуудай ерэхэдэ, зобоһон, тулиһан, арай гэжэ үндыһэн зонтойшье уулзахаш. Дайнай ветерануудтай, ара талын ажалшадтай хөөрэлдэхэдөө, урдань һүгэдэн дохихоор байдаг һэн. Би нэгэ материалаа удаахан бэшээшье һаа, гоёор, шэмэтэйгээр, удхатайгаар бэшэхэ гэжэ оролдодог байгааб. «Толон» һониндо хүдэлнэб гэжэ һанахадаа, досоомни омогорхол түрэдэг бэлэй. 2004 ондо нэгэ нюдэмни гэнтэ харахаа болишоо, тиигээшье һаа ажалаа хэжэл ябааб», - гэжэ Цыремжит Аюшиевна хөөрэнэ.
--------------------------------------------------------------------------------------------------------------------------------------------------------------------
О. Базаргуруева гэр бүлэтэеэ.
«Амар сайн» гүрэнэй дуу ба хатарай үндэһэтэнэй театрта чанза дээрэ хори гаран жэлэй туршада Оюна Базаргуруева наадана. Чанза буряад арадай хүгжэмэй зэмсэгүүдэй тоодо ородог. Тэрэнэй толгой мориной тархиин дүрсэтэй, торхонь могойн арһаар татагдаһан, дүрбэн хүбшэргэтэй бшуу.
Оюна арюун сэбэр аршаантай Алхана нютагһаа уг гарбалтай юм. Абань - Дугаржап Майдариев нютагайнгаа соёлой байшанда киномеханигаар хүдэлдэг, олон тоото хүгжэмэй зэмсэгүүд дээрэ наададаг байһан. Тэрэл басагаяа хүгжэмдэ һожортой болгоһон. Цыцык Цыбенова эжынь үдэртөө дэлгүүртэ, үдэшэ болоходо, соёлой байшанда кинодо орогшодто билет худалдадаг кассираар хүдэлдэг байһан. Мүнөө 75-тай, «Эхэ-герой» нэрэ зэргэтэй, Алханадаа амар мэндэ ажаһуудаг.
Оюна арбан хүүгэдэй наймадахи болоно. Багадаа гэр бүлын ансамбльнуудай харалга-мүрысөөнүүдтэ бүлөөрөө хабаадажа, түрүү һууринуудта хүртэдэг байһан. «Энхэ тайбан» гэһэн түрүүшынгээ дуу нэгэдэхи ангиин байхадаа гүйсэдхэһэн юм.
О.Базаргуруева 1991 ондо Алханынгаа дунда һургуули түгэсхөөд, Улаан-Үдэ хото буряад хэлэнэй багша болохоёо ошоһон аад, орожо шадангүй, гэртээ бусаһан юм. Жэл үнгэрхэдэнь, Улаан-Үдын хүгжэмэй училищи ошожо, дахин шалгалта барижа туршаһан шуу. Түрүүн морин хуур дээрэ наадахаяа һанаһан байгаа. Тиихэдэнь «Шинии хурган чанзадал таараха», - гэжэ С.Д.Гуруева багшань хэлээд, һургуулида абаа.
1996 онһоо Оюна «Амар сайн» театрта хүдэлжэ эхилээ. Тэрэ гэһээр таһалгаряагүй эндээл ажаллана. 2011 онһоо Улаан-Үдын ВСГАКИ-да «арадай уран урлалай зохёол» гэһэн мэргэжэлдэ заочноор һуража, дээдэ һургуулитай болоһон юм. Марина Цырендашиева дүү басаганиинь баһал «Амар сайн» театрта амжалтатай хүдэлнэ гэжэ мэдээжэ. 1970 оной Баир ахань Дулдаргын хүүгэдэй студида хатарай багшаар хүдэлжэ байтараа, гэнтын ушараар наһа бараа. Эдэнэр гурбуулаа «Агын Буряадай автономито тойрогой соёлой габьяата хүдэлмэрилэгшэ» нэрэ зэргэдэ хүртэһэн. «Дуратай, һанаандаа таарама мэргэжэлээр хүдэлжэ байхада, гоё. Энэ мэргэжэл шэлэһэндээ нэгэшье халагладаггүйб. Һая ороод байхадаа, концерт-нааданай урда зүрхэмни түшэгэнэдэг, ехээр һанаагаа зободог һэнби, харин мүнөө дадааб. Тойрогой бэеэ даанги байха үедэ бидэ театртаяа олон нютагуудаар, бүхы Европоор, Хитад, Монгол оронуудаар ябаабди», - гэжэ тэрэ хөөрэнэ.
Дэлгэрэнгыгээр 47-дохи дугаарта.
