Амгалан тайбан
Ага нютагнай, амар сайн!
Аба эжынэр –
Арад түмэмнай, амар сайн!
Танай аша туһаар
Тамир хүсэ олонхойбди,
Танай зааһан замаар
Талаан хубитай, золтойбди.

* * *
… Ага-Хангил гү,
Али Аргалишье байг лэ,
Аба эжынэрэй
Аша буянда һүгэдэнхэйб,
Ажал хэрэгэй
Агуу хүсэндэ этигэнхэйб.
Нютаг оронойм
Нюур шарай урихан лэ,
Намтар түүхыем
Нарин нягтаар сахидаг лэ –
Хүсэл, зоригоо
Хүн арадтаа зорюулнаб…
Хүдэр, тэниглэн
Хүсэ нэгэтэй байһандаа,
Хүрьһэтэ дэлхэйн
Хүндэ ямбада хүртөөбди.
Ага нютагнай
Аласай дайда бэшэ даа,
Арад бүгэдын
Анхарха һайхан тоонто лэ.
Тоонто гэгдэһээр
Толоржо урган хүгжэнэл,
Тоомжотой, суутай
Тодорхо замаа дэмжэнэл,
Орон дэлхэйн
Орёо байдалтай үедэшье
Одо заяамнай
Олоной оролдолгоор бүхэжэнэл!
Угай дансаар буряад арадай
Урдаа хараха ниислэл хото
Улаан-Yдэдөөш үдэг
Урда Хориин Ага нютаг…
Улас түрэеэ толгойлһон
Урин һайхан Улаан-Yдэм
Уг гарбалаараа холбоотой
Улад зоноо угтан байдаг…
Баатар хүсэн, бодол түгэлдэр
Бабжа баатар мэргэнтэй,
Урин зулгы, сэсэн хүдэр
Урма дүүрэн Балжан хатантай
Улас гэгдэһэн Буряад оромнай,
Ууган түрэл эжэл араднай
Унги холын эрэлхэг түүхэтэй –
Энхэ, мүнхэ үльгэр домогтой!

* * *
Yнгэрһэн сагуудтаа
Yзэхые үзөөд гараһан
Yндэр, сарюун наһатай
Yбгэд хүгшэдтэ дохином.
Баруун, зүүн дайнуудта
Баатар зориг харуулһан
Бардам дорюун хүбүүдээ
Барлан дурсан суурханам.
Арын хүшэр ажалда
Ами бэеэ гамнангүй,
Асари ехэ Илалта
Асарһан габьяатай
Ажалша бүхэриг арадай
Алдар соло магтанам,
Амжалтаар түгэс хүнүүдээ
Амаршалжа угтанам!

Арсалан ЖАМБАЛОН.

You have no rights to post comments