Монгол ороной, Хитадай Шэнэхээнэй, Россиин нютаг можонуудай гүлмэрхэншье һаа, хүдэрхэн, шадалтайхан хүбүүд сугларжа, һээрэй бүхые туршажа, олохон дабаануудые дабаа. Агымнай залуу хүбүүд баһал шадаха зэргээрээ хабаадажа, дүй дүршэлтэй боложол байна гэхээр.
   Наһанайнгаа бүлэгтэ Монгол ороной Мунхжаргал Базарсад алтан медаляар, Эрхүүгэй можын Александр Бидяшкин мүнгэн медаляар, Буряад Уласай Алексей Бадмаев хүрэл медаляар шагнагдаа. Эдэл шанга хүбүүд гурбуулаа 374 һээршэд сооһоо «Алтаргана» нааданай абарга һээршэниие элирүүлгын мүрысɵɵнэй финалда дахяад шалгаран гараа.
   Мүрысɵɵнэй шүүгшэ Солбон Чердоновой мэдүүлһээр, Мунхжаргал Базарсад – абарга һээршэн болоһон хүбүүн – 15 наһатай, айлай гурбан хүүгэдэй одхониинь. Монголой Ара Хангайн аймагай Үлзытэ һомоной юм, Улаан-Баатар хотын 124-дэхи һургуулиин 10-дахи ангиин һурагша. Тэрээндэ 200000 түхэригэй сертификат барюулагдаа, илагшын бүһэ зүүлгэгдээ.
   Александр Бидяшкин – 2-дохи һуури эзэлһэн һээршэн, 50000 түхэриг шүүгээ. Александр 17 наһатай, һэнгэлдэр угай. Эрхүүгэй можын Ойхоной аймагай Онгурен нютагай дунда һургуулиин һурагша.
   Алексей Бадмаев 3-дахи һуурида гаража, 30000 түхэригэй сертификадта хүртɵɵ. Алексей онгорёон угай, бүлын 4 хүүгэдэй одхониинь, 19 наһатай. Захааминай агропромышленна техникум дүүргэһэн. «Алтан Мундарга-2022» мүрысɵɵндэ ɵɵрынгɵɵ наһанай бүлэгтэ абарга һээршэн болоһон.
Элинсэг хулинсагуудай сахижа ябаһан ёһо заншал баримталан, тамирай үндэһэн янзануудаар үндэр амжалтануудые туйлахыень залуу һээршэдтэ хүсэе.

You have no rights to post comments