«Би буряадби» гэжэ омогорходог
   Хойто-Ага нютагһаа гарбалтай хурса хутагата худанса шарайд омогой Багшын Аюшатан 1918 ондо Монгол нүүжэ ошоод, Дорнод аймагай Баяндунда түбхинэһэн юм. Олон үри һа-даһадынь элинсэгүүдэйнгээ тоонто түрүүшынхеэ бараалхахаяа ерээ (энэ бүлэ тухай хожом бэшэгдэхэ).
   Зураглалайм герой хуасай угай Лхаасурэнгийн Бат-Очирой Аригуун хадаа Багшын Аюшын Доржын басаганай аша хүбүүн болоно. Лхаасурэнгийн Бат-Очир ба Лхагвасурэнгийн Түгсжаргал хоёрой бүлэдэ 1986 ондо Улаан-Баатарта 5 басагадай дунда түрэһэн. Абань Москвада Г.В.Плехановай нэрэмжэтэ Россиин экономическа университет экономист-кибернетик мэргэжэлтэй дүүргэһэн. Тиигээд 1990 он болотор Үндэһэтэнэй тоо бүридхэлгын эмхидэ программистаар ажаллаа. Эжынь Москвагай гүрэнэй геодезиин ба картографиин университет түгэсхэжэ, Монгол Уласай Эрдэмүүдэй академидэ хүдэлөө. Энэ бүлэ 1990-ээд онуудаар наймаа эрхилһэн байна.
   Аригуун дунда һургуулиин 1-2-дохи ангида һуража байхадаа, ород хэлэ үзэһэн, саашадаа үзөөгүйгөө халаглана. Дунда һургуулиин һүүлээр Улаан-Баатарта Монгол Уласай гүрэнэй ехэ һургуулида ороо. Экономист мэргэжэлтэй дүүргэжэ, UNITEL гэжэ сотово компанида, тэрэ үедэ Монголой эгээ ехээр хүгжэжэ байһан эмхидэ программистаар 4 жэл ажаллаа. Һүүлээрнь олон компанида хүдэлһэн байна, тэрэнэй сэдьхэл зохёохы шэглэл руу ехээр таталдадаг байгаа. Хажуугаарнь тэрэ наймаашье ябуулжа туршаһан.
   2023 онһоо Аригуун Монгол Уласай эгээ томо MGL Radio 88.3 FM радиостанцида монгол хэлэн дээрэ дамжуулга хэдэг юм. Энэ радиостанцида үшөө англи хэлэн дээрэ дамжуулга гарадаг, һүүлэй үедэ ород хэлэн дээрэ хэгдэжэ эхилээ. Монголдо англи хэлэн ехэ дэлгэрэнги, залуушуул өөһэдөө шудалдаг болонхой. Хүршэ ороноор аяншалдаг Баир танилайм хөөрэһөөр, монголнууд хармаандаа хашарһашьегүй һаа, хайшаашье гараад, ажал хээд ерэхэ, зүрхэтэй, залуушуулынь урагшаа һанаатай, эрмэлзэлтэй, хүсэл ехэтэй байхадаа, һанаһандаа хүрэдэг.
   Монгол Улас руу жэгтэй олон аяншалагшад ерэдэг. Англи хэлэ ушаргүй һайнаар шудалаашьегүй һаа, юрын яряанай хэлээр олон залуу хүбүүд, басагад аяншалагшадта туһалхаһаа гадна соёлтоёо болон ёһо заншалнуудтаяа танилсуулдаг. Тиигэжэ тэдэ англи хэлэндэ һурадаг, хэлэеэ хүгжөөдэг, дүршэлтэй болодог байна.
   «Мүнөө урдын сагта шэнги «би буряадби» гэжэ нюухаяа болиһон саг ха юм даа. Монголой юрэнхы сайдай нэгэдүгээр орлогшо, экономикын ба хүгжэлтын сайд Ням-Осорой Учрал болон гүрэнэй хуралай депутат Н.Номтойбаяр гэгшэд үндэһэн дэгэлээ үмдөөд, буряадби гэжэ омогорхожо байдаг юм.
   Бишье буряад угсаатанби гэжэ заатагүй буряад дэгэлээ үмдөөд, һонинуудые дамжуулдагби. Хүнһөө айжа, эшэжэ байдаггүйб, омогорхожо ябадагби. Сэдьхэлдээ би буряадби, түрэл хэлэеэ мэдэхэб, мэдэхэеэ, ойлгохоёо һананаб гэжэ һанажашье байхань шухала. Эгээ эрдэмтэй, мэдээжэ политигууднай – Элбэг-Доржи Ринчино, Цыбен Жамцарано болон бусад. Тэдэ «Монгол туургатанай 100 эрхим» (100 величайших монголов) гэжэ тоодо ородог, энэ тоо ходо нэмэгдэжэ байдаг. Тэдээн соо буряадууд олон», - гэжэ диктор Аригуун хөөрэнэ.

You have no rights to post comments