Сентябрь һарада Кирилл Александрович Усть-Ордагай Буряадай тойрогоор, Буряад Уласай Ахын аймагаар ябаа, октябрь һарада Хальмаг Улас нүхэдтөө айлшалаа.
   «Элһэтэдэ дулаан, наратай, хаа-яахан бороон һабинажа байгаа. Халуун лэ бэшэ һаань, тэндэ гоё. Элһэтэ – таримал модоор элбэг, гоё хото. Олонхи ажаһуугшадынь – хальмагууд. Теэд залуушуулай хүдэлхэ га-зар үгы, тэдэ Москва, Санкт-Петербург, дүтын Ростов, Волгоград, Ставрополь хотонууд руу ажал хэхэеэ ошодог байна», - гэжэ Кирилл Куликов хөөрэнэ.
   Мүнөө жэлэй сентябрь һарада Элһэтэ хотодо 6 метр үндэртэй Хальмагай шухала оюун һүлдэ ба хамгаалагша болохо Ногоон Дара эхын хүрэл дүрэ-хүрэг бодхоогдоо һэн. Тэрэниие һүзэг-шэдэй болон аяншалагшадай ябаха булан болгохо зорилготой ерээдүйн Будда-паркын дэбисхэр дээрэ табиһан юм.
   Кирилл Александровичай тэндэ байхада, Энэдхэгһээ Бурхан Багшын «Реликвии Капила-васту» гэжэ мэдээжэ шарил асарагдаа. Элһэтэ хотын түб хурул (дуугаа) соо табигдажа, һүзэгшэд 6 хоногой туршада мүргэхэ аргатай байбад. Хүнүүд мүргэхэеэ олоор суглараа. «Хоёрдохи үдэр 4 саг хүлеэжэ мүргөөб, 3-дахи үдэртэ зон 8 саг хүлеэгээд ороһон байна. Хоёр үдэр болоод, дасанай захиргаан зоной орохо, гарахыень зохёожо, 2 оошор табижа, һүзэгшэд 15 минута соо орожо эхилээ. Хэн ямар үйлын үрэтэйб – тэды саг зогсохо байжа магад», - гэжэ хөөрэнэ.
   Элһэтэ хотын олон дабхар гэрнүүдтэ Бурхан Багшын ажабайдал харуулһан томо зурагууд, хэлэһэн үгэнүүдтэйнь плакадууд үлгөөтэй, зарим буудалай һарабша, гэрнүүдэй оройнууд дасанай маягтайгаар баригдаһан байһые аяншалагша тэмдэглээ. Буддын шажанай уласхоорондын хуралдаанай үнгэргэгдэхэдэ зохёогдоһон байжа болоо.

You have no rights to post comments