"Алтаргана-2020" Агада болохо.

 

Бүгэдэ буряадай XIII «Алтаргана» нааданда уран бүтээлэй 14, тамирай 6 мүрысөөн эмхидхэгдээ. Наада хаалгын баяр ёһололой эхиндэ «Труд» стадионой үргэн талмай дээрэ 5 хизаар оронуудай эрхим хабаадагшад ба түлөөлэгшэд уригдаа.
«Алтарганын» туг буулгаха хүндэ «Ангара» ансамблиин хүтэлбэрилэгшэ Н.Шаргаевта ба «Степные напевы» ансамблиин бүжэгшэн Ч.Тыхеевтэ үгтэбэ. Тайзан дээрэ Эрхүүгэй можын засаг дарга С.Г.Левченко, Үбэр Байгалай засагай газарые Федеральна суглаанда түлөөлэгшэ Б.Б.Жамсуев, Агын тойрогой Захиргаанай хүтэлбэрилэгшэ Б.С.Доржиев, Россиин Ажалай Баатар Д.Г.Гунгаев уригдажа, «Алтарганын» туг Үбэр Байгалай хизаарай Агын Буряадай тойрог түлөөлэгшэдтэ дамжуулагдаба.
Дараань С.Г.Левченко дангинанарай мүрысөөндэ түрүүлжэ гараһан Арюна Дашиева (Үбэр Байгал), Алина Дондокова (Буряад орон), Анастасия Данилова (Эрхүүгэй можо), Алтана Жамьянова (Үбэр Байгал), Виктория Криволапова (Буряад орон) гэгшэдые амаршалжа, шангуудые барюулаа. Тэрэнэй удаа Усть-Ордагай Буряадай тойрогой захиргаанай хүтэлбэрилэгшэ А.А.Прокопьев «Буряад хуб-саһан: ёһо заншал ба оршон саг» гэһэн хубсаһа зохёогшодой харалгада түрүүлһэн Мария Маглаева (Эрхүүгэй можо), Цырегма Цырендоржын (Үбэр Монгол), Түдэбэй Мишэгма ба Жамсарайн Бадма (Буряад орон), Ольга Крылова (Эрхүүгэй можо), Улзыма Нанзатова (Буряад орон), Дарима Жалсанова, Нина Митупова, Намжилма Эрдынеева (Үбэр Байгал) гэгшэдые амаршалба.
«Буряадай нэгэ үдэр» гэһэн мүрысөөндэ илгаржа гараһан «Баян Сүмбэр» (Хэжэнгын аймаг), «Ургы» (Агын аймаг), «Наян Наваа» (Үбэр Монгол), «Үүрэй толон» (Хэнтэйн аймаг), «Эрмэлзэл» (Оһын аймаг) бүлгэмүүдэй хабаадагшад гаража, үндэһэн хубсаһаараа олон харагшадай һонирхол татаа һэн.
Тайзан дээрэ оршон үеын мэдээжэ дуушад Д.Ирдынеев ба А.Бороев (Үбэр Байгал), Д.Долгормаа (Монгол орон), Д.Сунрапова (Буряад орон) гаража, дуунуудаа бэлэглээ. Да-раань сугларһан зон бүгэдөө-рөө үргэн талмайда уригдажа, ёохорто хабаадаа һэн. Бүгэдэ буряадай наадан заншалта болоһон «Алтаргана» дуугаар хаагдаа.
«Алтаргана» нааданай, мү-рысөөнүүдэй талмайнууд бэе бэедээ дүтэ байгаа гэжэ онсолон тэмдэглэе.

You have no rights to post comments