Тиимэһээ «Традиционный костюм» янзада хабаадагшадай жэнхэни хубсаһан тухайгаа тон һайнаар мэдэдэгынь, мүн модельерэй ажалда тон дуратай байһаниинь эли. Энэ янзада Буряад орон, Эрхүүгэй можо, Дотор Монгол, Монгол орон ба Үбэр Байгалай хизаар түлѳѳлһэн 11 модельернүүдэй гоё һайхан дэгэлнүүд харуу-лагдаа. Тэдэнэй дундаһаа Эрхүүгэй можын Мария Маглаевагай, Шэнэхээнэй Цырендоржиин Цырегмагай, Буряад ороной Тудувиин Мацзигема Бадма Жамсарайн хоёрой буряад заншалта хубсаһанай суглуулбаринууд һайшаагдажа, тэдэнэр лауреадай дипломуудта хүртэбэ. Эндэ Үбэр Байгалай хизаар түлѳѳлһэн Чимитцырен Батодалаева Дашима Гончикова хоёр хэнһээш дутуугүй хубсаһанай суглуулбаритай аад, арайл талаангүйдэбэ.
Мүрысѳѳнэй «Стилизованный костюм» янзада хабаадаһан «Знаки зодиака» хубсаһанай суглуулбари шүүгшэдтэ һайшаагдажа, зохёогшонь - манай хизаарые түлѳѳлһэн Нина Митупова лауреат болобо. Тиихэдэ энэл янзада «Моим сестрёнкам», «Хориин хатан» гэһэн хубсаһанай суглуулбаринуудые дурадхаһан Эрхүүгэй можын Ольга Крылова, Буряад ороной Улзыма Ванзатова гэгшэд баһал эрхимүүд гээд тодоржо, лауреадай нэрэ зэргэдэ хүртэбэд.
Гурбадахи «Наряды в стиле «Авангард» янзада хубсаһанай харалга тон түрүүн нээжэ, тайзан дээрэ гараһан Буряад ороной Ханда Шадапова, Үбэр Байгалай хизаарай Дарима Жалсанова, Эрхүүгэй можын Анжелика Алсаткина гурбан лауреадууд болоһон байна. Тэдэнэр тус тустаа «Магия духа», «Соохорой түбэрѳѳн», «Шубуунии ноёд» гэһэн суглуулбаринуудые олоной үзэмжэдэ табяа. Энэл янзада «Түмэн хээ» гэһэн суглуулбари бэлдэжэ ошоһон Үбэр Байгалай хизаарай түлѳѳлэгшэ Баирма Дашинимаева хабаадалсаһан байна.
Һүүлшын янза «Прет-а-порте» - эндэ түрэл хизаарайнгаа түлѳѳ хабаадаһан Намжилма Эрдынеева «Ага Fashion», Буряад ороной Алёна Артемьева «Шангри-ла», Эрхүүгэй можын Людмила Понамарёва «Возвращение к истокам» гэһэн хубсаһанай суглуулбаринуудые дурадхаад, юһэн модельернүүдэй дундаһаа шалгаржа, лауреадай нэрэ зэргэтэй болоо юм.
Эдэ бүхы хубсаһануудые хараад байхадаа, буряад хубсаһаяа магтахаар байна даа: элдэб гоё үнгэтэй, элдэб янзын түхэлтэй, буряадуудаймнай бэедэ, нюур шарайда тон зохидоор таараһан. Зүбѳѳрѳѳл хажуу тээм, хойгуурниш һууһан харагшад «Гое-еэ гоё!», «Браво!», «Молодцы!» гэхэ мэтээр хашхаралдаа, эшхэрэлдээл даа. Буряад-монгол угсаатан соомнай ямар сэбэрхэн, гоё бэетэй, үндэр басагад, хүбүүд байдаг юм, буряад хубсаһамнай хүниие ямараар ѳѳдэ татан харуулдаг юм гэжэ гайхажа барахаар бэшэл!

You have no rights to post comments