Мария соёлой һалбарида хүдэлѳѳшьегүй һаа, үнэхѳѳрѳѳ, оёдол хэхэ угаа дуратай юм. Тэрэ һаяхан 36 наһатай болоо. Эрхүү хотодо ажаһуудаг, хүүгэдэй сэсэрлигтэ хүмүүжүүлэгшээр хүдэлнэ. Багшанарай институдта орожо, басагадта технологи заадаг багшын мэргэжэлтэй гараһан Мария тэрэл үедэ оёдол хэлгын урлалтай дүтѳѳр танилсажа, дүй дүршэл абажа эхилһэн. Буряад хубсаһа ёһо соонь оёхын тула тэрэ элдэб литература, илангаяа урдын фото-зурагуудые хаража шэнжэлхэ дуратай. Тиихэдээ фото-зурагууд дээрэхи буряад хубсаһатай зоной яажа хубсалдаг, ямар бүдѳѳр оёдог, ямар үнгэнүүдые тааруулдаг, ямар түхэлтэйгѳѳр бүтээдэг байһан бэ гэжэ дүтэрхышье һаань таахые оролдодог, дүй дүршэлдѳѳ хэрэглэдэг байна.
Залуу модельерэй хубсаһанай суглуулбари һонин нэрэтэй байба. Тэрэнь Эрхүүгэй можын Эхирэд-Булагадай аймагта оршодог, Калин гэжэ нэрэтэй үбгэн абынь анхан ажаһууһан Ябартуй газарай нэрээр нэршээ. «Хамталалгын үе хүрэтэр Ябартуйда хүдѳѳ һуурин байһан. Энэ газар эхирэд ба булагадай ажаһуудаг хилэ дээрэ оршодог. Ябартуй гэхэдээ, «там, где рождается метель» гэһэн удхатай», - гээд мүрысѳѳнэй үедэ харуулһан слайд соогоо Ябартуй газарай шарай оруулалсаһан Мария мэдүүлбэ.

Дэлгэрэнгыгээр "Толоной" 29-дэхи дугаарта.

You have no rights to post comments