- Урдахи жэлнүүдэй «Алтаргана» наадантай сасуулхада, энэ мүрысөөндэ дуу гүйсэдхэдэг шангахан басагад, хүбүүд ерээд байна. Үбэр Байгалай, Буряад Уласай ба Эрхүүгэй можын зохёогшод гоёл дуунуудые бэшэһэн байна. Бидэ, дуушад, тэрээндэ ехэл баяртайбди. Юундэб гэхэдэ, он жэл бүхэнэй үн-гэрхэдэ, шэнэ дуунуудые хүлеэдэгбди. Дуунууд гараха, гарахашьегүй байдаг ха юм. Тиимэһээ би энээндэ олзуурханаб. Эмхидхэлэй хорооной талаар харахада, бүлгэмүүд, соло, дуэт, трио дуулаһан хабаадагшадые ниилүүлһэн ушар хадаа мүнгэн һангай асуудал гэжэ һананаб. Тиигээд лэ наһаарнь 2 бүлэгтэ хубаагдаа. Шүүһэн үхибүүдые тэмдэглэхэ болоо һаа, Улаан-Үдын Алина Иванова ямар гоёор дуулана гээшэб?! Дулма Сунраповагай шаби. Хүүгэдэй «Мүнгэн хонхонууд» бүлгэм Россиин Баатар Алдар Цыденжапов-та зорюулагдаһан амаргүй гоё дуу гүйсэдхөө. Энэ дууниинь, нээрээшье, зүрхэ сэдьхэл хүдэлгэмэ, уярхаар дуун болоод байна. Энэ дуу бэшэһэн шэнэ үеын эстрадна композитор гэхэдэ, хүүхэлдэйн театраймнай «Золотая маска» шагнал абаһан Эрдэни Жалсановай Москва хотодо ажаһуудаг Саран-Туя басаган юм. Гадна Дулдаргын аймагай Эльвира Жанчибон баһал гоёор дуулаа. Минии һанамжаар, Хойто-Агын Евгений Аюшеев шадабаритай хүбүүн ургажа байна.
17-һоо дээшэ наһанай бүлэгтэ 32 дуушад хабаадаа, 64 дуу шагнаабди. Буряад соёлойнгоо үргэгдэжэ байһанда баяртайбди. 2 жэлэй удаа хүн зоной сугларжа, талаан бэлигээ харуулжа, дүй дүршэлөөрөө хубаалдажа байхада, гоёл гээшэб даа. Минии гансахан асуудал гэхэдэ, жэл бүри бүлгэмүүд ерээд, хуушан,1950-1980-яад онуудай дуунуудые дуулана. Шэнэ дуунууд дабтагданагүй ааб даа. Нүгөө Агада болохо «Алтаргана» нааданда дүримдэнь дуушад, бүлгэмүүд тус тустаа шэнэ дуунуудые дуулаа һаань, болохо һэн гэһэн һанамжа оруулхаар гэжэ бодоноб.
Алишье нютагһаа ерэһэн үхибүүн бүхэн ното мэдэнэ, шадабаритай үхибүүд гэжэ тэмдэглэхэ байнаб. Ерээдүйн сагта эдэ хабаадагшадай дундаһаа буряадай эстрадна дуушад заалһаа гараха байха гэжэ бодомжолноб. Тиимэ үхибүүд олон байна. Арбаад жэлэй туршада дуу дуулажа ябаад, экономист гү, али судья мэргэжэл шэлэжэ ошоходонь, хүүгэдтэ хүндэ байдаг гэжэ ажагладагби. Тиимэһээ аба эжынэртэнь хандаха байнаб: хэрбээ дуулаха бэлигтэй үхибүүтэй һаа, буряад соёл гэгээрэлээ үргэлсэжэ ябаһан хүүгэдээ дэмжэжэ, тэдэнээ соёлой талаар ябуу-лаа һаань, һайн байха һэн.
Агын буряадууднай сэбэр буряад хэлээр дуулана гээшэ ааб даа. Харин эрхүүгэйхидтэ энэ талаар хүндэшэг. Бидэ тэрэниие ойлгожо, досоогоо багтаажа, тэрэнэй түлөө үлүү доошонь дүнгүүдыень даража байгаагүйбди. Хүнэй ерээд, дуулажа байхаһаа гоё юун байхаб даа?! Үхибүүдээ үргэжэ, үри хүүгэдээ соёлдоо һургажа, дэмжэжэ бай-ха гээшэ «Алтаргана» нааданаймнай үүргэ ха юм даа. Түрүүшын алхамуудые хэжэ байһан үхибүүе альган дээрээ үргэжэ, саашань дэмжэжэ байхада, ажалнайшье урагшатай байхал.

You have no rights to post comments