Монголой Дорнод, Хэнтэйн аймагуудһаа, Улаан-Баатар хотоһоо, Шэнэхээнэй Баруун һомонһоо бэрхэ шатаршад ерэжэ, «Алтаргана» наада шэмэглээ бшуу. Улаан-Баатар хотоһоо шатар наадаар дэлхэй дүүрэн амжалта илалтаараа суурхаһан, дэлхэйн чемпионадта хабаадаһан гроссмейстер Батчимег Тувшинтугс ерэжэ наадаа. Буряад орониие түлөөлжэ, мэдээжэ шатаршад нютагайнгаа нэрэ хүндэ хамгаа-лаа. Зарим тэдыень нэрлэбэл, Антон Шомоев, Инна Ивахинова, Олег Бадмацыренов, Баир Буруев – барандаа гроссмейс-тер нэрэ зэргэтэй. Эрхүүгэй можоһоо үнгэрэгшэ «Алтаргана - 2016» нааданда абарга болоһон Дмитрий Оболенских хабаадаа. Мүрысөө хаража байхада, ФИДЕ-гэй мастер нэрэ зэргэтэй тамиршадһаа доошоо зиндаатай хабаадагшад байгаагүй. Үбэр Байгалай хизаарые түлөөлжэ, Шэтын ба Агын тойрогой эрхим шатаршад сугларжа, гроссмейстернүүдэй урдаһаа шанга тэмсэл үгөө. Түрэл хизаараймнай найдал болохо, ганса гроссмейстер Денис Абашеев хабаадаһан байна. Тойрогһоо можо бо-ложо олон шатаршад ошоо. Нэрлэбэл, Бато Шойжинимаев, Татьяна Бальчиндоржиева, Жаргал Жамбуев, Зорикто Цыбенов, Оюна Дамдинова, Татьяна Захарова ба бусад болоно. Денис Абашеев Ксения басагаяа абаашажа наадуулһаниинь эрхим дүн харуулаа.
Мүрысөөн хубиин ба можонуудай хоорондо үнгэргэгдөө. Можодо 4 хүн ороо: 2 бүһэтэн, 2 эхэнэрнүүд. Наа-дан швейцарска гуримаар 9 тур үргэл-жэлөө. Бүһэтэн ба эхэнэрнүүд аминдаа наадаһан байна. Нэгэ наадан 10 минута үргэлжэлһэн байха юм. Судьянар һүүлдэ илагшадые элирүүлхэдээ, Бухгольцын, Бергерэй коэфициентээр дүн согсолһон байна. Тойрогой шатаршадые ударидажа ябаһан, шатарай багша Зорикто Цыбеновэй хэлэһээр, «Алтаргана-2016» фестивальһаа эхилжэ, шатар гээшэ ехэ хүгжэлтэ абаа, хабаадагшадай бүридэл шанга болоо. Анханда 1-дэхи разрядтай, ФИДЕ-гэй мастернууд хабаададаг байһан һаа, оршон сагта уласхоорондын гроссмейстернүүд хабаададаг болоо.

You have no rights to post comments