Талын дунда
Тас-няс гэлдэшэхэ талын дунда…
Таанад сошоод абахат гэнтэ.
Доро зүрхэтэйшүүлшье эндэ мэгдэхэл,
Добын саагуур хорожошье болохол.
Хүс-нюс гэлдэшэнэ ехэ хүсэнүүд,
Хүүгэд гайхана… Мүргэлдэнэ хусанууд.
Һүрэг хонидынь һэншье гэнэгүй,
Һүрѳѳтэй энэ тулалдаа тооногүй.
Хусанууд - хоёр мантан хүсэнүүд
Хуа тооһо бурьюулан тэмсэнэд.
Тас-няс! Тархяа һэжэрнэ нэгэниинь,
Таагаа ха нүгѳѳдэнь «болиё» гэһыень.
Эбэр байнал гэжэ мүргэлдэбэл,
Эшхэбтэр ха юм гэлдэбэ.
Урда урдаһаа харалсан эблэрээд,
Урданайхяараал эбтэй бэлшэбэ зэргэлээд.
Үшѳѳ удаан мүргэлдэхѳѳ яагааб гэжэ
Үхибүүд тиихэдэ һанаа бэзэ.
…Хамта нүхэсэжэ ябахал хадаа
Харалсаһаар наншалдахань аягүйл даа.
Янгархуу
Залуухан түлгэ хонимнай
Заахан хурьгаяа дүмэнэгүй…
Бээрэжэ, дааража үзэхыень
Бэлшээридэ түрэжэрхёо гээшэ гү?
Ууралтаһан бэеыень долёогоо,
Уурагаа хүхүүлээ хурьгандаа.
Дугдаахай баабайн дархалһан
Дулаахан мухалиг соо оробол даа.
…Олигойхёор маараба хурьгахан,
Орхигты эхэтэйм гэһэндэл.
Саһатай зүргэ харгыхан
Сабидар мориндо танилхан…
Даараашьегүй даа хурьган маадай,
Даншье янгархуу юм!
Һэеы гэртэ үндыһэн баабай
Һэнгэргүй шэрээд ябашоо һэн.
Буу
Хонишоной хүбүүн Бадма-Дари
Хоёртой гү, гурбатай…
Баабайнь ашадаа бэлэг баряа,
Баясахань лэ ёһотой.
Үгэһэн нааданхайень үргэжэ үзѳѳд,
Үүхэйлжэ үгэбэшьегүй.
Хүбүүхэн асууба хүлзэшоод:
- Хүрзэ гү даа, бэшэ гү?
Агнуурида һожоргүй баабайнь
Амаа ангайшоо:
- Энэш, ашам, буу гээшэ,
Түүс байса буудадаг.
- Буу гээшэ юун гээшэб?
- Буудадаг юумэн…
- Юу буудадаг юумэн гээшэб?
- Юушье… шоно, гарюуһа…
- Шоно эндэ байха гү? -
Шортоол хүбүүхэн асууна.
Одоо хоорондоо ехэ багагүй
Ойлголсохоо болёод һууна.
Буу, шоно… Шоно, буу -
Булта хүбүүндэ ойлгосогүй.
Булхайжа, булхайжа тэсэбэгүй:
- Буу тиигээ һаа – муу…
Батууха
Газааһаа оромсоороо, гайхаба ахань
Гансаараа үлэһэн Батууха дүүгээ:
Аляа, ѳѳрэ табатайхан эрхэнь
Амандаа уһа балгаһандал дуугай.
Ахань асууна:
- Яагаабши, Батууха?
Аягүйрхэнэ хүбүүхэн.
- Нюһамни гарана…
-Эй, теэд ниихэеэ яанаш нюһаяа?!
- Иигээд байхадам гаранагүйл, - гэнэ.
Мэдэнэб: нюһаниинь гарахашье һанаагүй,
Мэхээ хүдэлгэжэ, миин лэ тиигэнэ.
Аман соогоо конфетэ тугаарай
Ахайһаа нюусаар хэжэрхёод шииганана.
Нюухаяа Батууха яажа мэдээб:
«Нюһамни гарана» гэжэ хэлээ.
Ѳѳрэ, бэрхэ хүбүүн аад, пэй даа,
Ѳѳрыгѳѳ яндан нюһантай жэшээ…
