Һаалгадаг үнеэнһээ бэшэ үхэрөө иимэ тиимэ зүһэтэй гэхэһээ бэшэ, нэрэ үгэжэ нэрлэдэггүй һэн: сагаан хашараг, хүрин гунан, малаан буруун г.м. Үнеэдээ эмэ үхэр гэжэ зааһан удхатай -гшан суффикс хэрэглэжэ нэрлэдэг һэн: сагаагшан – сагаан гү, али сайбар зүһэтэй үнеэн; хүүгшэн – боробтор зүһэтэй; харагшан – хара зүһэтэй; буурагшан – буурал, үнэһэлиг боро зүһэтэй; хуаагшан – хуаа, сайбар шаргал зүһэтэй; һаарагшан – һаарал, хүрибтэр боро зүһэтэй; хүригшэн – хүрин, харалгы хүрин зүһэтэй; алагшан – бэень сагаан аад, сээжэ болон уусань ямар бэ даа ондоо зүһэтэй; малаагшан – толгойнь эбэрнүүдэйнгээ хоорондоһоо эхилээд, нюдэдэйнь хоорондуур доошоо аман хүрэтэрөө сагаан, мүн саминь сагаан байжа болохо; ёбуунтай үнеэн (сохынгоо тэгэн дунда сагаан толботой); эреэгшэн (ямаршье зүһэтэй аад, элдэб түхэлэй сагаан толбонуудтай).
