Тон түрүүн һэеы гэрэй хана бодхоодог юм. 5-10 ханатай гэр байха. Хана бургааһа матажа хэдэг. Бургааһануудаа хэрээһэлэн баряад, хэрээһэлһэн газартань нүхэлжэ үдөөридэдэг.

Ханын һэлгэлдэһэн үзүүрнүүдэй дээдэ талые тархи, хажуу тээхииень аман гээд нэрлэдэг. Ханануудаа бодхоод, амануудыень бэе бэедэнь тааруулжа амалуулдаг. Амануудайнь тааралдахалаар, уулзалдаһыень барюулжа дороһоонь дээшэнь уядаг. Дээһэн уяань хагсарга гэжэ нэрэтэй.

Гэрэйнгээ урда талада үүдэ барижа, ханануудтайнь тааруулха.
Үүдэнэй баруун талада хасабша - сонхо зариман хэдэг.

Үүдэ тодхоод байхадаа, тэрэнэйнгээ баруун можодо зохёоһон бүтүүнүүдтэ дээгүүр, дундуур ба доогуур шагтагалһан үти гэжэ нэрэтэй ута дээһэн ооһор татажа, ханануудай газаа талаарнь тойруулан абаашаад, үүдэнэй зүүн можын бүтүүнүүдтэ уядаг юм.

Ханануудаа бодхоод, нэгэнэйнгээ тооно баряад үгэхэдэнь, бусадынь уняалжа эхилхэ. Тоонын түхэреэниинь ханын тооһоо дулдыдаха.

Тооно тулаад байдаг гэрэй гол тулга хадаа бахана болоно. Бахана толгойтой, далбаатай, эшэтэй байдаг.

Нарһаар хэгдэдэг уняа тооно хана хоёроо холбодог. Хамта 60-70 уняа байха. Уняагай үзүүрнүүдые тоонын нүхэнүүд руу углаад, доодо үзүүрынь ханын тархида бүгэлдэргэлхэ ёһотой. Бүгэлдэргэ - уняагай доодо үзүүртэ орууланхай дээһэн бүтүү.

Уняагаа бодхоогоод, туургануудые тоходог. Туурга гээшэ гэрэй ханада тоходог гурбан метр тухай утатай һэеы юм. Уняануудай дээгүүр дээбэри тоходог. Дээбэринь хоёр байдаг: түрүүн урда, тиигээд хойто дээбэри тохохо. Туургын дээдэ заха дээбэритэй дабхасалдадаг. Тэдэнэй хоорондохи забһарые забаг гэхэ. Туургын газаа талаарнь бүһэлүүр - хоёр дээһэн бүһэ: нэгынь дээгүүр, нүгөөдынь дундуур татадаг.

Туургануудые тохоходо, доогуурнь багахан забһар үлэдэг. Тэрээниие бүглэхын тула хаяабша байха. Хүйтэн болоходонь, хаяабша татажа, хаяа бүглэдэг, халуунда тэдэнээ абаха.

Гэрэй оройн тоонын нүхэ бүглэхын тула үрхэ байха. Энэнь хайша хайшаа хоёр метр тухай үргэнтэй, 4-6 шэгшэгтэй һэеы юм. Шэгшэгүүдынь ута ооһорнуудтай, тэдэнииень гэрэй бүһэдэ уядаг юм. Урда талынь ооһороор үрхэ нээдэг ба хаадаг.

You have no rights to post comments