Түүхэһээнь богонихоноор
Агын аймагай захиргаанай, К.Базарсадаевай нэрэмжэтэ Агын хүүгэдэй уран урлалай һургуулиин эмхидхэн байгуулһан ба К.Базарсадаевай нэрэмжэтэ соёлой жасын дэмжэлтээр түрүүшынхеэ тэбхэр арбан жэлэй саана үнгэргэгдэһэн энэ мүрысөөн мүнөө зургаадахяа эмхидхэгдэбэ. Аймагай хэмжээнэй мүрысөөн ябан ошон ургалта абаад, 2019 ондо Үбэр Байгалай хизаарай удха шанартай хэмжээ ябуулгануудай тоодо оруулагдаһан, Агын Буряадай тойрогой Захиргаан эмхидхэн байгуулагшань болоһон.
Хэн мэдэхэб?
Ким Иванович багашаг ябаад, оперын театрай гол дуушан Бадма Балдаковой дуулахые һайхашаан, хурса мэдэрэлдэ абтаад, артистын гримёрно руу орожо, буряад арадай дуу дуулаһан ха. Тиигэжэ эдир хүбүүн бүхэли наһаяа зохёохы замтай холбоо бэлэй. Ленинградай консерваториин оюутан ябахадаа, Ленинградай гастрольно-концертнэ нэгэдэлэй филармониин таһагай гол дуушанаар уригдаһан, совет эстрадын, театр болон киногой артист Аркадий Райкин, дуушад ба актрисанууд Марлен Дитрих, Клавдия Шульженко гэгшэдтэй хамта нэгэ тайзан дээрэ гүйсэдхэһэн, А.Александровай нэрэмжэтэ Совет Армиин дуу ба хатарай ансамбльда гол дуушанаар хүдэлһэн. Хэн мэдэхэб, энэшье мүрысөөн мүнөө талаан туршажа ябаһан эдиршүүлдэ соёлой үргэн зам нээжэ, тэдэнэй дундаһаа хожом хойно буряад арадаа суурхуулжа, олондо һайшаагдажа ябаха дуушан ургажашье магад.
