Һүниие һүни гэнгүй, үдэрые үдэр гэнгүй, ямаршье сагта ходо хажуудатнай байжа бөөмэйлһэн, эдеэ хоолоор таһалдуулангүй, һургаал заабари хэлэжэ ябаһан эхэ эсэгэеэ, аха заха зоноо хүндэлжэ, ашыень харюулхада буян шуу. Эхэ эсэгынгээ, наһатай зоной ядаха сагтань туһалха, үбшэн, хэбтэриин болоһон хүниие галлаха гээшэ баһал ехэ буян болоно. Ядажа ябаһан хүндэ туһала гэхэдээ, даараһан хүрэһэн хүниие дулаасуула, гэдэһээ үлдэһэн, ангаһан хүнэй унда харяа, эдеэлүүлэ гэжэ заадаг байгаа.
Буянтай ябахын тула хамаг муу ааша, үйлэ ябадалнуудые тэбшэжэ, һайн үйлэ хэрэгүүдые бүтээхэ хэрэгтэй. Жэшээнь, гансаардаһаниие сэдьхэлэй дулаагаар жэгнэхэ, наһатай зондо гурбан зөөлэниие эдлүүлхэ, түгэншэлжэ ябаһан зониие гэртээ урижа хонуулха г.м. һайн юумэ үйлэдэбэл, буян хуряагдана, туһа эрижэ абаһан хүн хэһэн һайе һанажа ябаха, өөртэш туһалха бшуу. Тиимэһээ «Урдуураа гараһаниие ундалуула, хойгуураа гараһаниие хонуула», «Туһа хэһэн үрэтэй, тодхор хэһэн харюутай», «Хүндэ туһагүй – Бурханда буянгүй», «Хорые тоһоор харюула», «Зан буруутай хүндэ зол жаргал тудахагүй» г.м. олон һургаалтай сэсэн мэргэн үгэнүүд бии.

Долгор Раднабазарова.

You have no rights to post comments