Барга Баатарай хүбүүд
Барга баатар гурбан хүбүүдтэй байhан: Үлеэдэй, Буряадай, Хоридой. Тэрэ хүбүүдэйнгээ ехэнүүд болоходонь, саашанхи ажабайдалайнь харгы заажа, адуу малаа, алта мүнгэеэ аб адлиханаар, халюун дайдаяа тэб тэгшэхэнээр хубаажа үгэhэн.
Үлеэдэй баатарта
Үлеэдэй баатар бүрд гэмэ бурьялма түргэн сухалтай, мэргэн, хурдан хүн байгаа.
«Хоёр дүүтэеэ багтангүй бай-хадаа болохо», - гэжэ Барга баатар hанаад, Хальмагай уужам газар дайдаар мал адууhа үдхэжэ hуухыень үреэhэн.
Буряадай хүбүүндээ
Дунда хүбүүн Буряадайдаа Байгал шадар түбхинэжэ, гал гуламтаяа түхеэржэ, ажалаа сахижа, буусаяа hахижа, уг гарбалаа үргэлжэлүүлжэ hуухыень тогтооhон. Тиихэдээ «Нэрыем нэрлүүлжэ ябаарай», - гэжэ Барга баатар хэлэhэн ха.
Хоридой мэргэндэ
Хоридой агнуурида бэрхэ, мэргэн байhан. Байгалhаа урагшаа хада хүбшөөр агнуури эрхилжэ, табан хушуун мал үсхэбэрилжэ, хоёр хушуун үринэрые үдхэжэ, тоо томшогүй олон боложо ябахыень Барга баатар хүсэhэн.
Долоон үе
Эртэ урдын caгhaa буряад зон долоон үе түрэлөө мэдэдэг, хоорондоо айл боложо, шуhаяа холихогүй гэжэ ехэ нарилдаг байhан. Тэрэ сагhаа хойшо энэ ёhо заншалаа алдаагүй.
Буряад арадай отог
Барга баатарай гурбан хүбүүдhээ хальмаг, эхирэд, булгад, хори удамай зон үдэhэн гэжэ домог соо хэлэгдэдэг. Буряад хүн бүхэн уг гарбалайнгаа эшэ үндэhэ мэдэжэ, газар yhaн дээрэ гансаараа бэшэб, бүхы угсаатантаяа, арад зонтоёо нягта холбоотойб гэжэ мэдэрхэнь тон шухала.
Б-М.Жигжитовэй «Алтан тоонтын магтаал», Г-С.Ешиевагай «Юумэн бүхэн өөрын удхатай, өөрын заншал гуримтай» номуудые хэрэглэжэ, Валентина ЦЫРЕНЖАПОВА бэлдэбэ.
