Будда бурханай «шүдэн»
Үндэр наһатай хүгшэн наймаашан хүбүүнтэеэ ажаһуудаг байгаа. Хүбүүниинь ажалай хэрэгээр Энэдхэг орон руу ябантуу байдаг һэн ха.
Хүбүүнэйнгээ Энэдхэг ошохо гэжэ харгыда гарахаяа түхеэржэ байтарынь, эжынь байлгаад: «Энэдхэгтэ Буддын гэгээрһэн газар байха. Бодхгайя гэжэ нэрэтэй. Тиишээ хүрөөд, гэртээ бусахадаа, нангинаар хадагалаатай юумэ абаад ерээрэй, тэрээгээршни бэеэ арилгахаб», - гэжэ захиба.
Хүбүүнэйнгээ һайнаар хадуужа абахын тула эжынь энээн тушаа оло дахин һануулжа хэлэһэн байна. Теэд хүбүүниинь талаар ошохо бүхэндөө захяаень мартаад лэ бусаха. Удаадахяа ошохоо байтарынь, эжынь дахяад һануулаа: «Энэ удаа асараагүй һаашни, нюдэн дорошни өөртөө хоро хүргэхэб.
Хүбүүн Энэдхэг ошожо, өөрынгөө хэрэг бүтээгээд, эхынгээ хэлэһэн захяа дахяад мартаа. Гэртээ дүтэлжэ ябатараа, хэлэһыень һанажархёод, тэрэ бодолгото болобо: «Хэлэһэн юумыень асараагүйб, гэртээ хооһон ороо һаам, эжымни өөртөө хоро хүргэхэ». Хүбүүн тойроод хараашалба. Харахадань, газарта нохой тархиин яһан хэбтэжэ байба. Тэрэ яһанһаа нэгэ шүдыень абаад, бүд соо орёогоод, гэртээ ошобо. Гэртээ ороод, тэрэнээ эжыдээ һарбайба ха. «Эжы! Энэ Будда бурханай шүдэн. Маани уншажа, бэеэ сэбэрлэхэдэтнай, ехэ туһатай байха», - гэжэ худалаар хэлэбэ.
Наһатай эжынь хүбүүндээ этигэжэ, шүдэндэ шүтэдэг болобо. Сэдьхэлһээ үнэн сэхээр шүтэдэг, зальбардаг байхадань, нохойн шүдэнһөө олон тоото монсогорхон субад гарадаг болоо. Эжынь наһанһаа нүгшэхэдэ, бэень һолонго мэтэ элдэб үнгөөр яларжа байһан ха.
(Үргэлжэлэлынь 47-дохи дугаарта уншахада болохо).
Эрдэни ЧИМИТДОРЖИЕВ.
