Буряадууд дэлхэйн олон булангуудаар ажаһуудаг, холын хари гүрэнүүдээр аяншалдаг болонхой. Тэдэл, гэрһээ холо ябаһан зон, түрэл нютагаа ехээр һанажа, тоонтынгоо сэнтэйень ойлгодог. Эгээл иимэ удхатайгаар Буряад ороной Яруунын аймагай Тэлэмбэ нютагһаа уг гарбалтай харгана омогой Арюна Цыбикова мүнөө жэл Улаан-Үдэ хотодо «Зам» гэһэн этно-маркет нээжэ, үнинэй һанажа ябаһан хүсэлөө бэелүүлээ бшуу.

Арюна 1986 ондо Улаан-Үдэдэ түрэһэн. 2003 ондо Улаан-Үдын лингвистическэ 3-дахи гимнази дүүргээд, Москва хотодо РФ-гэй Правительствын дэргэдэхи Финансова академи 2008 ондо түгэсхөө. Тиигээд хэдэн жэлэй туршада гүрэнэй албанай ажал хэжэ ябаһан юм. Хажуугаарнь олон гүрэнүүдээр аяншалһан байна. Түрэл нютагһаа холо ябахадаа, тоонтотоёо холбоотой байха гээшэ ехэ удха шанартай юм гэжэ бэе дээрээ үзөө. Юуб гэхэдэ, ондоо газарта ябахадань, Арюные солонгос гү, али яхад яһанай басаган гэжэ һанадаг байһан. Нэгэтэ Арюна «буряадууд хэд гээшэбибди?» гэжэ ехэ һанаата болоод, Улаан-Үдэеэ бусахадаа, тоонто нютагтаа туһатай юумэ – үнинэй һанажа ябаһан хүсэлөө бэелүүлхэмни гэжэ бодоо юм.

Мүнөө «Зам» этно-маркет Улаан-Үдэ хотын түбтэ, Зүблэлэй талмай дээрэ оршодог. Энэ эмхи байгша оной августын хуушаар үүдэеэ сэлеэ. Харин хуулита ёһоор нээлгэнь сентябриин 8-да үнгэргэгдэһэн байна. Энэ хэмжээ ябуулгада олон хүндэтэ айлшад, артистнар, фото-буулгагшад, сурбалжалагшад хабаадаа юм. Энэ түһөө түсэбэй ашаар Буряад ороной зохёохы шадабаритайшуул, уран гартай зон, уран зураашад, соёлой хүдэлмэрилэгшэд, залуушуул нэгэдэхэ аргатай, зүбшэн хэлсэхэ газартай болоо.

Байшанай нэгэдэхи дабхарта үмсын хэрэг эрхилэгшэдэй - дизайнернуудай, уран зураашадай бүтээлнүүд табигдадаг. Тус эмхиин хүгжэлтын талаар менеджер Чимита Бадмаева хөөрэнэ: «Һүүлэй үедэ буряадууд соёлоо мартажа байна. Хүн зон ондоо хотонууд руу зөөжэ, түрэһэн хотын хүгжэлтэдэ хубитаяа оруулнагүй. Тиимэһээ үмсын хэрэг эрхилэгшэдтэ анхаралаа табижа, нютагайнгаа үйлэдбэри хүгжөөнэбди. Жэшээнь, энэ дэлгүүртэ байһан бүтээлнүүд булта Улаан-Үдын дизайнернуудай болоно. Бидэ тэдэнииень худалдажа үгэнэбди. Түрэл нютагнай талаан бэлигтэйшүүлээр баян байна даа».

«Зам» этно-маркет ороходо, урин зантай басагад дулааханаар угтажа абаад, зүбшэл заабари үгэнэ. Танхим соо буряад дуунууд үргэлжэ табигдана. Түрэл буряад хэлэн дээрэ хүүгэдтэ зорюулагдаһан болон буддын шажанай номуудай стеллаж, Далай ламын уншалгануудай дискнүүд олон. Нютагай үйлэдбэриин эдеэгээр хүн зон ехээр һонирходог байна. Хоёр залуу басагадай шанаһан элдэб янзын амтатай арахисай пастые айлшад ехэ зохидшоодог, оюутад хэшээлэйнгээ урда тээ ороод, витаминуудаар баян айрһа абаад ошодог ха. Саашаа ябахада, элдэб янзын сай, үнэтэ шулуугаар хэгдэһэн гоёолтонууд, олон уран зурагууд, нэхэжэ оёһон малгайнууд, хүүгэдэй ба томошуулай хубсаһан, дэгэлнүүд, бүхэ барилдаашадай үмдэдэг шуудагууд, паспортын ба оюутанай биледэй даханууд, түбэд мылэ, хадагууд, амаршалгын открытканууд г.м. олон тоото үндэһэтэнэй маягтай бүтээлнүүд байна.

Дэлгэрэнгыгээр 49-дэхи дугаарта.

You have no rights to post comments