Июниин 10-12-то Түнхэнэй аймагай Толтой нютагта буряад адуушадай дунда абаргые элирүүлхэ «Буряад мориной соло» гэһэн регионууд хоорондын фестиваль-мүрысөөн түрүүшынхеэ эмхидхэгдэхээр хараалагдана.
Адуушадай мүрысөө эмхидхэгшэдэй нэгэн - хүдөөдэ үмсын ажахытай, бодонгууд угай Баир Доржиев апрелиин хуушаар Дулдаргын аймагай Зүдхэли нютагһаа гаража, Түнхэн хүрэтэр морёор ошохо зорилготой.
Б.Доржиев.
«Интернет соо «Буряад адуушад» гэжэ 1000-аад хүтэй бүлэг бии. Адуушад эндэ харилсажа, бэе бэедээ туһалдаг. Арга боломжоороо мүнгэ суглуулаад, мүрысөө, уулзалгануудые үнгэргэдэгбди.
Улаан-Үдэдэ «түхэреэн шэрээ» эмхидхэхэдэнь, «Урга» гэһэн түлэблэл бэлдээд ошоо һэнби. Ниитын эдэбхитэн Георгий Жамбалдоржиевич Шакталаевтай суг тэрэ түлэблэлөө үргэдхэжэ, «Буряад мориной соло» гэжэ нэрэтэй болгоходомнай, түнхэнэйхид нютагтаа түрүүшын наада эмхидхэхэ дуратай байгаа.
Цырендашын Рабдан ба Доржын Хандацырен аба эжымнай адуунда, малда һайсал хүдэлһэн. Би бага наһанһаа хүдөөгэй ажалтай танилби. Мүнөө апрель һарын хуушаар Зоригто ехэ хүбүүнтэеэ, Ранжи дүү хүбүүнтэеэ суг холын замда морёор гарахабди. Буряад заншал, нэрэеэ дээшэнь үргэжэ, Ага нютагайнгаа моридой шадал, шэрхииень ба адуушанай ажал ямар бэ гэжэ харуулха зорилгонууд табигдана. Харгыдаа буряад дэгэл хубсаһатай, мориной заһал гоёолтотой ябахабди, борсо, айраг, ээзгэй, замбаа г.м. малайнгаа ашаг шэмээр хооллохобди», - гэжэ Баир Долгорович тодорхойлоо һэн.
Адуушадай мүрысөөндэ можо бүхэн 5 хүнһөө бүридэхэ, мори урилдаан, «Эрэ хүнэй эрдэни» гэһэн конкурс ба элдэб мастер-классууд үнгэргэгдэхэ юм.
Жалсан ЛУБСАНДАШИЕВ.
