Агын 3-дахи дунда һургуулиин эхин шатын ангинуудта һурадаг багашуулай урманда наадаха, бэеэ һорихо, сүлөө сагаа ашатайгаар үнгэргэхэ талада һайн эрхэ нүхэсэл зохёогдонхой. Багшанар, хүмүүжүүлэгшэд багашуулай арадайнгаа ёһо заншал, һургаал, зан заршам, хэлэ, түүхэ мэдэжэ абахын тула үргэн программа зохёоһон байна. Тодорхойлходо, буряад хэлэн дээрэ хэшээлнүүдые үнгэргэнэ. Эндэ һая арадай үндэһэн эдеэ хоолдо зорюулагдаһан хэшээл ябуулаа. Багашуул буряад арадай ямар хоол бииб, хайшан гэжэ буйлуулдаг бэ гэжэ мэдэдэг болоо. Мяхаар, талхаар, һүөөр ямар хоол бэлдэдэг бэ гэһэн викторина эмхидхэгдээ. Шатар, шагай наадаар мүрысөөнүүд болоһон байна. Хүмүүжүүлэгшэд үхибүүдые дахуулжа, Г.Цыбиковэй нэрэмжэтэ, байгаалиин музейнүүдта абаашажа, хизаар оронойнгоо түүхэ, баялигуудтай танилсуулна.
Агын 1-дэхи дунда һургуулиин эхин шатын ангинуудай шабинарта ёһо заншалай, арадай наадануудай хэшээлнүүд үдэр бүри ябуулагдана. Үхибүүд буряад дэгэл үмдөөд, арадай наада наадана, ёһо заншалаа үзэнэ. «Алтан, наашаа», баргай наадан, шагай няһалалга, дүрбэн бэрхэ, мори урилдаан гэхэ мэтые наадана, таабари таалсалга, оньһон үгэ сээжэлдэлгэ, арадай аман зохёолнуудые мэдэлгээр хэшээлнүүд болоно. Багша Арюна Дашинимаева багашуулда «Хүхюу буряад» гэһэн кружок ябуулжа, мүн элдэб юумэ урлажа һургана.
(Үргэлжэлэлынь 23-дахи дугаарта).
Эрдэни ЧИМИТДОРЖИЕВ.
