- Даша-Сэрэн, аяар холоhоо ерэжэ, нютаг руугаа манай мүрысөөнэй сэхэ дамжуулга хэжэ байhандатнай баяртай байнабди.
   - Би сүлөө сагтаа hайн дураараа элдэб сэдэбээр буулгабаринуудые хэдэгби, hээр шааха аргагүй дуратайб. Мүнөө жэл Шэнэхээндэ болоhон Yбэлэй найрта бүдүүн hээр шаагаад, гараа гэмтээб, тиигээд Агада гарабагүйб.
   - Yбэлэй найр гэжэ ямар найр болоноб?
   - Энэ hайндэр Шэнэхээндээ 3-дахи жэлээ үнгэргэжэ байнабди, Харбин хотодо жэл бүри Саhанай Ехэ найрые үргэлжэлүүлhэн hайндэр юм, хүн зоной зугаалхын тула иимэ найр байгуулаабди.
   - Шэнэхээнhээ хэды хүн ерээбта?
   - Дүрбэн хүн ерээбди, гурбамнай hээр шаана. Агын аймагай Согто-Хангилда ажаhуудаг манай Шэнэхээнэй Балацзинима аха хабаадана.
   Бидэ Манжуур хотодо hээр шаалгаар мүрысөө эмхидхэдэг болохобди. Мүнөө Агада hээр шаалга яагаад хэнэб гэжэ буулгажа ябанаб, нютагайхид ехэ һонирхожо харана, хүн зонтой хөөрэлдэнэб, танилсанаб, гоё байна даа. Иимэ мүрысөөнүүдhээ сэхэ дамжуулгануудые хэжэ hуража байнаб.
   - Ямар угайбта?
   - Онгор хуасай омогойб. Бабуугай Дабаа абамнай 1952 оной, эжы хүбдүүд угай Бурин-Жаргалан Дашисуу, 1953 оной. Дүрбэн хүүгэдэй одхонииньби. Манай хүгшэн аба эжы Бооржын Yлирэнгэ нютагhаа Шэнэхээн гаража ошоhон.
   - Ага түрүүшынхеэ ерээ гүт? Танай hанамжа…
   - Би – түрүүшынхеэ, Сэнгэлэн аха оло дахин ерэhэн. Адлихан, Шэнэхээнhээ ондоо бэшэл даа, хаа-яа хүнэй ородоор дуугархада, ойлгохоёо болишоноб.
   - Хаана түрэhэмта?
   - Шэнэхээнэй Баруун hомоной Холбоото гэжэ нютаг – минии тоонто, 1995 ондо түрэhэнби, гахай жэлтэйб. Минии нүхэр Наран-Шэмэг, 1996 ондо түрэhэн, барга яhатанай, хулгана жэлтэй, Монголдо hураhан. Хоёр хүүгэдтэйбди, басагамнай гурбатай болохоёо байна, хүбүүмнай дүрбэ hаратай.
   - Хаана hураhамта?
   - Хайларта дунда hургуули дүүргэhэнби. Дунда hургуулида 12 жэл hурадагбди, дээдэ hургуули хээгүйб, Хүхэ-Хотодо наймаа борлуулгын ажал хэдэг hэм.
   Мүнөө малшанби, табан хушуун мал баридагбди – 300 гаран хони ямаа, 70-аад үхэр, 6 тэмээ, 17 адууhа. Урдандаа шэнги жэлэй дүрбэ дахин малаараа зөөхэеэ болёобди, зуhалан, үбэлжөөн лэ гээд жэлэй хоёр нүүдэгбди.
   - Ажалшадтай гүт?
   - Yгы. Хадам аба эжы маанадта туhалдаг.
   - Yбhэ хэр бэлдэдэгбта?
   - Yбэлдөө малаа эндэхи шэнгеэр үбhэ үгөөд үбэлжүүлдэгбди, хабартаа, зундаа гаргадагбди. Ногооной ургаса элдэбын болодог, тиибэшье малдамнай хүрэдэг.
   - Гараараа үбhэ сабшадаг гүт?
   - Урдандаа морин косилкаар сабшадаг байhан, мүнөө трактораар сабшадагбди.
   - Малдаа обёос, талха, таряа үгэдэг гүт?
   - Хитадууд таридаг, бидэ тэдээнhээ худалдажа абадагбди. Харин өөhэдөө эдихэеэ багаар таридаг зон байха.

You have no rights to post comments