Агын талын хүдөө нютагуудаар ажаһуудаг шамбай шадалтай, шандааһатай, хурдан моридые зайдалаад, урилдаанай урда заха барижа гүйлгэдэг, хёрхо харасатай хүйхэрэй мэргэн 20 баатарнууд хоорондоо мүрысөө. Багжагар бэетэй бүхэшүүлэй мүрысэхые харахаяа тойрогой, хүршэ Ононой аймагай зон сугларжа, нюдэеэ хужарлуулаа, сэдьхэлээ баясуулаа бшуу. Хабаадаһан шамбайшуул Бабжа-Барас Баатарай нэрэ зэргэдэ хүртэхын түлөө эршэ хүсэеэ гарган эрмэлзээ. Эсэсэй эсэстэ «Бабжын нааданай Абарга Баатар» гэһэн хүндэтэй нэрэ зэргэдэ Хара-Шэбэр нютагай, галзууд омогой, 26 наһатай Намжил Цыденжапов дахяад хүртөө. «Бабжын нааданай Арсалан» гэһэн нэрэдэ Хүһөөшэ нютагай, 41 наһатай Баир Батомункуев хүртэһэн байна. Будалан нютагай бэрхэ барилдаашан, самбо тамираар тулалдадаг 29 наһатай Зорикто Ешиев «Бабжын нааданай Заан» нэрэдэ дахяад хүртэжэ, нютагайхидаа хүхеэгээ.
Агын аймагай, Ага тосхоной, Ононой аймагай Тари нютагай, Улаан-Үдэһөө суута «Байгал» театрай артистнар забһарлалай үедэ хатар наада харуулаа, дуушад Жаргал Жалсанов, Бадма-Ханда Аюшиева, Гэрэлма Жалсанова, Дандар Бадлуев, Бутидэй Дондок гэгшэд Бабжын наада шэмэглээ.
Тойрогой Захиргаанай, Агын аймагай засаг зургаанай хүтэлбэрилэгшэдэй домог түүхэтэ баатарай нэрэ мүнхэлжэ, «Бабжын наада» эмхидхэдэг болоһониинь һайшаалтай. Тойрогой талаан бэлигтэй соёлшон, Агын Буряадай автономито тойрогой соёлой габьяата хүдэлмэрилэгшэ Мунко-Жаргал Норсонов үнгэрэгшэ зуун жэлэй 90-ээд онуудта «Бабжын наада» Агын талада эмхидхэхэ үүсхэл гаргаһан түрүүшын хүн болоно. Хори гаран жэлэй хугасаа соо тус мүрысөөн үнгэргэгдөөгүй байһанаа, һаял 2017 ондо дахинаа һэргээгдэжэ, саашадаа хоёр жэлэй нэгэ удаа үнгэргэгдэдэг болоо.
Энэ удаа Бабжа-Барас баатарай нэрэдэ хүртэхын түлөө хүбүүдэй бар хүсэеэ үзэлсэхэ наадан эхиеэ абажа, хоёрдохи мүрысөөнэй нээлгын баяр ёһололдо олон зон хабаадаа.
«Бабжын наадан» үнгэрэгшэ жэл Карелиин орондо эмхидхэгдэһэн Бүхэроссиин конкурсдо гүрэнэй соёлой яаманай зүгһөө тусхай шанда хүртэһэн байна. Агын аймагай захиргаанай толгойлогшо, эмхидхэлэй хорооной түрүүлэгшэ Жаргал Жапов Ононой эрьедэ, Бабжа-Барас баатарай эрэлхэг шэн зориг харуулһан газар дэбисхэр дээрэ сугларһан айлшадые һайндэрөөр амаршалһан байха юм. Сенатор Баир Жамсуев, тойрогой Захиргаанай хүтэлбэрилэгшын уялга дүүргэгшэ Билигма Будаева гэгшэд тамирай-соёлой хэмжээ ябуулгада хабаадагшадые, сугларагшадые амаршалаа. «Хүндэ бэрхэшээлтэ сагта «Бабжын наада» эмхидхэһэн зоной нэрэнүүдые нэрлэжэ, тэдэнэй хэрэгыень үргэлжэлүүлжэ ябаха ёһотойбди. Саашадаа энэ мүрысөөнэй бүри һайн хүгжэлтэ абахыень хүсэнэб», - гэжэ Баир Баясхаланович амаршалгынгаа үгэ соо хэлээ. Үбэр Байгалай хизаарай амбан захирагша Александр Осиповой зүгһөө амаршалгын үгэнүүд уншагдаа. Буряад ороной Ивалгын аймагай захиргаанай толгойлогшо Виктор Очиров үгэ абажа, «Бабжын нааданда» айлшаар ерэжэ, хабаадажа байһандаа халуун баярые, Буряад ороной ажаһуугшадһаа амар мэндэ хүргөө. Мүн Хориин аймагай захиргаанай толгойлогшо Юрий Ширабдоржиевай зүгһөө амаршалгын үгэнүүд дамжуулагдаа. Удаань хабаадагшад тайзан дээрэ жагсаалда гараа, бултандань футболко бэлэгүүд барюулагдаа, хүн бүхэнтэйнь танилсуулга үнгэргэгдөө. Хабаадагшадай диилэнхи хубинь - барилдаашад, бэшэниинь – морёор урилдагшад, һур харбаха дуратайшуул. Тодорхойлходо, Согто-Хангилай, адуунда багаһаа дуратай, гургалдай шубуун мэтэ хоолойтой, шарайд угай 26 наһатай Мунко Батомункуев Сэрэг хүлэгтэеэ хабаадаа. Ага-Хангилай сагаангууд угай Дугар Гармажапов ба Лыгжима Сосорова гэгшэдэй һур харбаашадай гэр бүлын 32 наһатай хүбүүн Балдан Гармажапов Победа Алаг хүлэгтэеэ хабаадаһан байна. Будалан нютагай боохой хуасай омогой, 57 наһатай Баиржаб Ешиев Зорик хүбүүнтэеэ нютагайнгаа нэрэ хүндэ хамгаалаа. Согто-Хангил, Зүдхэли, Будалан, Сагаан-Уула, Хара-Шэбэр нютагуудһаа 2-3 түлөөлэгшэд хабаадаа. Агын дасанай шэрээтэ Бадма Цыбиков ба гэсхы Амгалан Жапов тамиршадта амжалта, аза талаан үреэжэ, Хии мориной сан уншаһан байна.
