Апрелиин 13-да Ц.Жамцараногой нэрэмжэтэ хизаарай номой сан соо тойрогой больницын эмшэдтэй уулзалга эмхидхэгдэһэн байна.
«Герои среди нас» гэһэн хэмжээ ябуулга ковид-19 гэһэн үбшэнтэй тэмсэлгэдэ зорюулагдаа. Уулзалгада ковид-19 үбшэнэй һүжэрхэдэ, түрүү зэргэдэ хүдэлһэн Агын тойрогой больницын эмшэд Цындыма Батомункина, Арюна Арьянова, Агын эмнэлгын колледжын багша Саида Ринчинова болон эмнэлгын колледжын оюутад, Агын 1-дэхи һургуулиин эмнэлгын шэглэл шэлэһэн һурагшад хабаадаа юм.
Коронавирус үбшэн тухай видео-буулгабари харуулагдаа, Агын түргэн туһаламжын врач Ирина Дугаровагай мэргэжэлтэ уялгаяа дүүргэжэ, ковид-19 үбшэнтэй тэмсэһээр, ами наһаяа үгэһэн тухай хэлэгдээ.
Цындыма Батомункина үбшэнэй hүжэрhэн тухай иигэжэ тэмдэглээ: «Хүндэ саг тохёолдоод байгаа. Больницымнай хүтэлбэри үбшэ танилга, эмнэлгын түргэн туhаламжаhаа эхилээд, амбулаторно ба больницада хэбтээд арга абалга, hэргылэлгын ба реабилитационно туhа хүргэлгэ хүрэтэрнь ажалаа дээдэ хэмжээндэ эмхидхээ. Ажаhуугшад, волонтёрнууд ба оюутад нилээд ехэ туhа хүргөө, тэдэ эмшэдые халуун эдеэгээр, унаагаар хангажа байгаа. Нэгэ команда мэтэ хүдэлжэ, энэ аймшагтай үбшэ диилэжэ байнабди. Үбшэнэй hүжэрэлгын аалидаашье hаа, бэеэ hула табингүй, hэргылэлгын хэмжээ ябуулгануудые сахижа - багуудые зүүжэ, бэеынгээ халууниие шалгажа, бэеэ элүүржүүлжэ ябыт даа гэхэ байнаб».
Һүүлээрнь hурагшад, оюутад эмшэдтэ асуудалнуудые табижа, харюунуудые абаа. Тиихэдээ Агын больницын эмшэд ганса тойрогой бэшэ, Хэрын, Акшаагай, Оловяннын аймагуудай үбшэнтэдые аргалhан байна гэжэ һануулая. Больницын бүхы албан шанга гуримда хүдэлөө, үбшэнэй hүжэрөөн соо үдэрэй 250 гаран үбшэнтэд элирүүлэгдэжэ байгаа. Мүнөө үбшэн дүүрэн усадхагдаадүй, үдэрэй 10-аад үбшэнтэд хандаhаар. Ехэ юумэн маанадhаа дулдыдана, жэшээнь, вакцинаци абалга.
Агын соёлой байшанай дуушад сугларагшадта дуу бэлэглээ. Хизаарай номой сангай хүдэлмэрилэгшэд эмшэдтэ өөһэдынгөө хэблүүлhэн Ц.Жамцараногой ажалнууд тухай дурасхаалта ном бэлэг баряа юм.
Нордоп БАБУЕВА.

You have no rights to post comments