Энэ олон жэлэй хугасаа соо Цындыма Очировна нэгэшье гэдэргээ сухарингүй, бэедээ таталюуртай үбшэнтэн бүхэнэй түлөө оролдоо. Юрэнхыдөө эмнэлгын сестрагай ажал юундэб даа ушаргүй тобойлгогдодоггүй шэнги байдаг, гэбэ яабашье эмшэнэй табиhан заабариин удаа, тэрэниие зүбөөр бэелүүлхэhээ гадна, анхарал харюусалга, аргами хүнгэн гар, илдам зулгы абари зан, хүн бүхэндэ дулаан хандаса юунhээшье шухала байдаг шуу. Эгээл эдээхэн шанар шэнжэнүүд минии зураглалай геройдо сэхэ хабаатай. Тала дайда мэтэ тэнигэр сэдьхэлтэй Цындыма Ешидоржиевагай ээлжээтэ үдэртөө орожо ерэхэдэнь, тэрэ дары номгон оршон байдал тогтожо, үбшэнтэнэй досоо наран толоржо, мэнэ гэhээр эдэгэхэ тухай найдал заатагүй түрэдэг. Өөрынгөө эжыдэ шэнгеэр эрхэлэн hагад хандаhан хүүгэд болон залуухан эжынэрые харахада, мүн лэ hайхан сэдьхэлыень дахин-дахин гэршэлнэ. «Алдуу хэжэ болохогүй, нарин нягта байха шухала, ямаршье хэсүү байдалда тэбдэхэгүйб, хэзээдэ-шье хүндэ туhаламжа үзүүлхэб» гэhэн шухаг тангариг хэтэ мүнхэдөө бэедээ шэнгээhэн юм.
   Балшар наhандаа томо болоходоо эмшэн болохоб гэжэ хүүхэлдэйнүүдээ тарижа, бүхы бэедэнь ногоон толбо табижа наададаг hааб даа. Анха түрүүн мэргэжэл шэлэхэ сагтань жэшээ болохо зон олон байгаа: бүхы наhаараа Дулдаргын больницада эхэнэрнүүдые хүнгэрүүлhэн акушер нагаса абгайнь Цындыма Лодоева, гадна абынь дүүнэр мүн лэ энэ больницын халдабарита үбшэнтэнэй таhагые даажа ябаhан Цындыма Дашибалбарова, хизаарай больницын эмнэлгын сестра Жаргалма Дашибалбарова гэгшэд. Харин үхибүүн наhандань үльгэртэ жэшээ болоhон хүн гэхэдэ, хэзээшье, нютаг дотороо «Доктор Басагаадай ахай» гээд нэршэhэн, одоол бүхы наhаараа Зүдхэлиин эмшэн ябаhан Михаил Дондокович Дондоков мүн болоно.

You have no rights to post comments