Хүһѳѳшэдэ сентябриин 27-до эмхидхэгдэһэн тойрогой Толгойлогшонорой Зүбшэлгын зүблэлдэ байгаад, энэ нютагһаа баруун тээшээ, Онон голо зубшаад ябахадамнай, нэлэнхы ехэ тала дайда нэмжыбэ. Талын дундуур “Хүһѳѳшэ” агрокооперативай таряалангууд, сабшалангууд зурыжа харагдана.
Нэгэ хэды модо ябаад, бидэнэр “Хүһѳѳшэ” агрокооперативай түрүүлэгшэ Доржи Батомункуевтай уулзаабди. Доржи Тумунович полинуудаа эрьен үзэжэ ябаа. Тойрог дотор хэдэн зуугаад гектарай таряалангууд гаргашалагдаһанда тоологдоһон (списано) юм, харин хүһѳѳшынхидэй таряан ургаһан байна. Шэниисэ һолоомониинь хара, шиигтэйшэг, тон шарлашоогүй, теэд сагнай хүлеэхэ бэшэ, таряашад ургасаяа хуряажа эхилээ. Таряаниинь һайн, нёдондонойхиһоо томо гээд түрүүлэгшэ тайлбарилба. Урдахи жэлнүүдтэ таридагаараал, 500 га обёос, 500 га шэниисэ, зуугаад га зелёнко тариһан байна. Теэд 500 га обёосынь наранда шатаа, гаргашалагдаһанда тоологдоо ха.
Хүһѳѳшын үбһэшэдэй гурбан бригада Оловяннын аймагай Хара Бэрхын саана гараад байна. Харин нютаг дээрэнь ногоон муу, сабшана юм гү, одоо “маажаналди” даа гээд Доржи Тумунович һанаа алдана. “Маажагдаһан” үбһэниинь, харахада, бортогор хара. Юундэ иимэ хара үбһэн бэ гэхэдэ, сабшагдаһан, бухаллаатай үбһэн бороондо ехээр сохюулаа юм гээ. Ногооржо харагдаһан үбһэндэ орходоо шанарынь хэзээш доошоо бэзэ, теэд сагаан саһанай орондо хара үбһэн байгаа һаа дээрэ гэдэг гээшэ ааб даа. “Хүһѳѳшэ” ажахын бүхы малшад үмсѳѳрѳѳ үбһэ абанад. Бүхыдѳѳ 14 бууса дээрэ 4500-гаад хонин, тэрэ тоодо 3300-гаад эхэ хонин, 200-гаад үхэр, 130-аад адуун – иимэ мал үбэлжэхэ. Мүнѳѳ хонидые үрэжүүлгын асуудал орёохон байна: эртэхэн түрүүлээ һаа гэхэдэ, үбһэн бага, оройхон болгоо һаа гэхэдэ, ногооной саг соогоо ургаагүй һаа яахаб?
Дэлгэрэнгыгээр 40-дэхи дугаарта.
