Малай үбэлжэлгын эхилhээр, хоёр hараhаа үлүүхэн саг үнгэрөө. Могойтын аймагай Кировэй нэрэмжэтэ ажахын (Хара-Шэбэр) хамтын мал харууhалдаг хонишод ба малшад ута нюргатай үбэлжэлгые эрхимээр дабажа байнхай. Энэ ажахын түрүүлэгшэ Абида Лхабановтай уулзажа, ажал хэрэгүүдтэйнь танилсаабди.
- Абида Мункуевич, танай хүтэлбэрилдэг ажахын мүнөөдэрэй байдал ямаршууб? Малшад үбэлжэлгэдэ хэр зэргэ бэлэдхэлтэй оробоб, малайтнай тоо хэдыб?
- Һүүлэй жэлнүүдтэ малай үбэлжэлгэ хүндэхэн байдалда үнгэрнэ. Эндэ ямар шалтагууд бииб гэхэдэ, үбhэ тэжээл багаар нөөсэлэгдэнэ. Сабшалан газарнуудаар ногоон муугаар ургана. Ондоо тээhээ асархань гарзатай. Хажуугаарнь ехэ саhан орожо, бэлшээри хушана. Декабриин 1-эй байдалаар, хүдөө буусануудта 3050 толгой хонин, 108 эбэртэ бодо мал, тэрэ тоодо 60 үнеэн ба hубай үхэрнүүд, 70 гаран адууһан үбэлжэнэ. Гурба мянга гаран хониной 2645-иинь эхэ хонид юм. Малдамнай гарза хоролто ажаглагдана. Бүдүүн мал гаргажа, үри шэриеэ хаанабди. Колхоз байһанаа, хүдөө ажахын кооператив болонхойбди. Мүнөө жэл ажахымнай үбһэшэд нютагтаа ба нютагһаа гадууршье гаража, малай хоол нөөсэлөө. Зундаа эртүүр Шиилхын аймаг руу сабшалан бэдэржэ, ургасатай газарта үбһэ сабшаабди. Тиигэжэ 961 тонно малай хоол нөөсэлэгдэжэ, малшадай буусануудаар тараагдаһан байна. Харин хараалһан түсэбнай - мянган тонно. Ноябриин эхеэр ехэ саhанай ороhоной һүүлээр бэлшээри хушагдашоо. Ноябриин наруули дулаан үдэрнүүдтэ мал бэлшэжэ, хагдаараа ябана. Хэрбээ саһанай үшөө оробол, малаа хорёо cоогоо хаагаад байха болонобди. Тиигэбэл малда хоол ехээр үгтэжэ, хабар болотор хүрэнгүй дууһаха бшуу. Малай хоол худалдажа абахабди. Тиигээгүй һаа, хоол хүрэхэгүй.
- Абида Мункуевич, үнгэржэ байһан жэлдэ Хара-Шэбэрэй таряашад хэды шэнээн ургаса хуряагаа гээшэб?
- Таряан ажалаа зондо арендэдэ үгэнхэйбди. Жэбхээһэндэ Екатерина Галсановагай, Арын Булагта Чимит Болотовой үмсын хамһабариин ажахынуудай бригаданууд таряа ургуулна. Эдэ ажахынууд аренднэ гуримай ёhоор ургасынгаа 10 хубииень ажахыдаа үгэхэ ёhотой бшуу. Мүнөө ган жэл байбашье, таряашадай бригаданууд хамтадаа 950 тонно ургаса хуряаһан байна.
Дэлгэрэнгыгээр 49-дэхи дугаарта.
