Хабарай шухала хүдэлмэринүүдтэ зорюулагдажа, тойрогой Захиргаанда хүдөө ажахынуудай мэргэжэлтэдэй хабаадалгатай зүблөөн үнгэргэгдэһэн байна. Хабарай тарилгада ямар бэлэдхэл боложо байнаб, ажахынууд таряанай үрэhөөр хэр хангагданхайб г.м. асуудалнуудаар элидхэлнүүд хэгдээ. Элидхэгшэдэй тэмдэглэһээр, ган жэлнүүд болобошье, ажахынууд байгаалиин хохидолһоо айнгүй, зүрхэтэйгөөр полинуудаа үргэдхөөд, таряа ехээр таридаг болонхой. Мал таряанай ургасада ехэ хохидол үзүүлдэг гээшэ. Тиимэһээ малда таряаланаа гэшхүүлхэгүйнь шухала. Хорёолоотой полиһоо ургаса абтаха. Үнгэрэгшэ жэл гандуу байбашье, таряашад хараалһан түсэбөө дүүргэһэн байгаа. Байгша ондо нэгэ гектарһаа дунда зэргээр 14 центнер ургаса абаха хараа түсэб табигдана. Тойрог дотор фермернүүдэй олон ажахы таряа ехээр ургуулхаар түсэблэнэ. Энэ жэлэй хабар 11 мянган гектар талмайда орооһото культуранууд, 4,5 мянган гектарта тэжээлэй хоол таригдахаар хараалагдана.

Хабарай тарилгада хэрэглэгдэхэ таряанай хүрэнгэ дуталдана, илангаяа обёосой хүрэнгэ ажахынуудта хэрэгтэй. Хабарай тарилгада 2866, тэрэ тоодо дээдэ сортын 256 тонно тухай таряанай хүрэнгэ хэрэгтэй болохо бшуу. Сувор Батомункинай ударидадаг үмсын эмхидэ болон «Хүнхэр» ажахыда хүрэнгын нөөсэ бии. Энэнь аймагай ажахынуудай хабарай тарилгада хүрэхэ байха. Тон хүндүүлхэй асуудалнуудай нэгэн гэхэдэ, трактор болоод бэшэшье техникэ, түхеэрэлтэнүүд нилээд хуушарhан, тэдэниие хэрэгтэй нөөсэ хэрэгсэлнүүдээр хангаха гээшэ ехэ орёо болонхой. Энэ асуудал жэл бүхэндэ хабарай тарилгын эхилхын урда тээ хурсаар табигдадаг. Шэнэ техникэ абаха гэхэдэ, ажахынуудта үлүү мүнгэн байхагүй. Гэбэшье ажахынууд байhан техникэеэ арга шадалаараа заhабарилаад, хабарай тарилгада, тэжээл бэлэдхэлдэ, таряа хуряалгада хэрэглэдэг ха юм даа.

«Дээрэhээ үгтэhэн туhаламжын мүнгэгүйгөөр хабарай тарилга үнгэргэхэмнай бэрхэтэй», - гэжэ таряа ургуулагшад онсо тэмдэглээ. Һаядаа субсидиин мүнгэн hомологдохоор хүлеэгдэнэ. Энээнhээ урагша шэнгэн түлишэдэ, ургаса хамгаалгада, минеральна үтэгжүүлгэдэ мүнгэн hомологдодог байhан hаа, мүнөө субсидяар үгтэhэн горитойхон мүнгөөр ажахынууд таряалангуудайнгаа талмай үргэдхэжэ, ехэ таряа ургуулдаг болоһон. Гэхэтэй хамта, тойрогой ажахынууд 208 тонно дээдэ сортын аммофос гэһэн минеральна үтэгжүүлгэ захинхай. Тарилгын урда тээ ажахынууд хүрэнгэеэ Бункер, Планриз зүйлнүүдээр хордоһон байна. Хабарай тарилгада ехэ хэмжээнэй солярка, дизельнэ тоһон, бензин хэрэгтэй болохо.

«Родина» ажахын түрүүлэгшэ Дарима Дондоковагай хэлэһээр, үнгэрэгшэ намар сагай уларилһаа боложо, зүдхэлиинхид түсэбтөө хүрэмэ ургаса хуряагаагүй. Байгша ондо ган жэл дахяад болохо гэжэ айнгүй, таряаланайнгаа талмай бага болгохогүй. Ямаршье ажал эрхилхын тула мүнгэнэй нөөсэ хэрэгтэй болодог. Таряанай ургасада муугаар нүлөө үзүүлдэг хяаг, үрмэдүүл хордохо минеральна үтэгжүүлгэтэй. Механизаторнууд барандаа 50 наһа гаранхай. Тэдэ хабарай тарилгада, намартаа ургаса хуряалгада жэншэдгүй хабаададаг дүршэлтэй мэргэжэлтэд юм. Апрель һарада дулаан үдэрнүүдэй тогтоходо, хабарай тарилгада хабаадуулагдаха техникэ заһабарилжа эхилээ һэн. Тарилгада «К-700», «КамАЗ» унаанууд ябаха. «Механизаторнуудай оролдолгоор техникэмнай ябадаг. Барандаа хуушарһаншье һаа, мүнөө ашаглагдана. Үнгэрэгшэ зуун жэлэй ная гаран онуудта гаргагдаһан тракторнууднай мүнөө маанадайнгаа урманда ябажал байна», - гэжэ Дарима Дондокова хэлээ.

Тойрогой Захиргаанай АПК-гай таһагые даагша Жаргалма Жаргаловагай мэдүүлһээр, хамтын ажахынуудаар 66 мянга гаран эхэ хонинһоо түл абтана. Эхэ хонид тойрогой хамтын ажахынуудай 141 буусада үсхэбэрилэгдэнэ. Байгша ондо хонишодто зуун эхэ хонинһоо ерэн хоёр хурьга абаха дунда зэргын түсэб-даабари табигдаһан байха юм. Һүүлшын жэлнүүдтэ эхэ хонидой тоо толгой олон болоно. Олон малтай ажахынууд хонин һүрэгөө арьбадхажал байна. Агын аймагай «Хүнхэр», «Согто-Хангил», «Урда-Ага», Могойтын аймагай«Гэрэл», Ленинэй нэрэмжэтэ (Зугаалай), «Хүһөөшэ», «Победа», Дулдаргын аймагай «Родина», «Онон», «Балжана» ажахынууд хонидые олоор үсхэбэрилнэ. Тойрог дотор эгээл түрүүн «Гэрэл» ажахы түл абалгынгаа ажал эхилээ. Тиимэһээ эндэ хараад үзэхэдэ, Могойтын аймагай ажахынууд олон хонитой байна бшуу. Мартын тэн багаар диилэнхи хуби ажахынууд түл абалгын харюусалгата ажалдаа ороо һэн. Зарим ажахынуудаар апрель һарада сакман эхилһэн байна.

You have no rights to post comments